Apeli e anuloi aktgjykimin lirues për babain e Vanjës: Gjykata Penale nuk i ka vlerësuar mjaftueshëm provat

Gjykata e Apelit Shkup i konfirmoi dënimet me burgim të përjetshëm për të katërt e dënuarit për rrëmbimin dhe vrasjen e 14-vjeçares Vanja Gjorçevska dhe për vrasjen e Pançe Zhezhovskit në nëntor 2023, mes tyre edhe Lupço Palevski - Palço. Por aktgjykimi lirues për babain e vajzës, Aleksandar Gjorçevski, është anuluar. Lënda për të kthehet në rigjykim.

Gjorçevski ishte akuzuar se e kishte ndihmuar rrëmbimin - sipas aktakuzës, u jepte rrëmbyesve informacione kur dhe ku do të lëvizte vajza e tij. Gjykata Penale e liroi me arsyetimin se Prokuroria Publike nuk e kishte provuar fajin e tij. Apeli tani thotë se problemi ndoshta nuk ishte te provat, por te sa me kujdes ishin lexuar.

„Aktgjykimi për Aleksandar Gjorçevskin është anuluar sepse provat e Prokurorisë Publike nuk janë vlerësuar mjaftueshëm“, thanë gjyqtarët në një brifing me mediat. Rekomandimi i tyre është rivlerësim me udhëzime konkrete, veçanërisht për tri gjëra: deklaratat e të akuzuarve të dhëna në prokurori, e të lexuara para gjykatës, dëshminë e nënës së Vanjës dhe mesazhet nga komunikimi në Viber.

Ky është mesazh i qartë nga një gjykatë më e lartë për një më të ulët. Nuk bëhet fjalë për provë të re që doli më vonë, por për material që ishte në lëndë qysh në gjykimin e parë. Nëse ato mesazhe dhe ato dëshmi ishin aty gjatë gjithë kohës, pse u desh një rreth i dytë që dikush t'i shikonte siç duhet?

Gjykata Penale më herët paralajmëroi se gjykimin e ri do ta caktojë sapo ta marrë vendimin. Familja, publiku dhe vetë i akuzuari do të presin edhe një proces për pyetjen që që nga nëntori i vitit 2023 rëndon mbi këtë rast. Këtë herë gjykata e di paraprakisht çfarë ka lënë pa parë.