Inflacion „50 për qind më i ulët“ se ai evropian. Kështu e paraqiti gjendjen ekonomike kryeministri Hristijan Mickoski, nga foltorja partiake në tubimin në Bërvenicë më 28 shtator. Shifrat që përmendi: 2,3 për qind në korrik dhe 2,6 për qind në gusht, kundrejt 2,9 dhe 3,2 për qind në Evropë.

Vetë shifrat janë të sakta. Matematika - jo aq. Inflacioni prej 2,6 kundrejt 3,2 për qind është më i ulët për rreth një të pestën, jo për gjysmën. Që të ishte vërtet „50 për qind më i ulët“, inflacioni i gushtit te ne duhej të ishte 1,6 për qind.

Por problemi më i madh nuk është përqindja. Inflacioni mat shpejtësinë me të cilën rriten çmimet, jo sa të larta janë ato. Një produkt që u shtrenjtua nga 100 në 140 denarë nuk lirohet kur bie inflacioni - vetëm vazhdon të rritet më ngadalë. Shtrenjtimet e mëparshme mbeten në çdo faturë.

Shporta nuk dëgjon fjalime

Sipas Lidhjes së Sindikatave të Maqedonisë, shporta minimale sindikale në shtator arriti 69.432 denarë - 757 denarë më shumë se në gusht, 4.355 denarë më shumë se në shtator të vitit të kaluar dhe 8.126 denarë më shumë krahasuar me vitin 2024. Paga mesatare neto në korrik, sipas Entit Shtetëror të Statistikës, ishte 48.499 denarë, reale 4,7 për qind më e lartë se një vit më parë. Dallimi mes shportës dhe një page mesatare është mbi 20.000 denarë - e mesatarja nuk thotë asgjë për ata që fitojnë nën të.

Ushqimi dhe pijet joalkoolike në vitin 2025 ishin rreth 74 për qind e nivelit mesatar të çmimeve në BE. Tingëllon lirë, derisa të krahasohet me pagat. Vetëm në gusht ushqimi dhe pijet joalkoolike u shtrenjtuan edhe 0,5 për qind brenda një muaji. Kryeministri, duke iu referuar vlerësimeve fillestare të Inspektoratit Shtetëror të Tregut, paralajmëron inflacion vjetor te ushqimi mes 1,5 dhe 2 për qind. Të dhënat përfundimtare do t'i japë Enti Shtetëror i Statistikës.

Rritja reale e BPV-së prej 4,3 për qind është e dhënë zyrtare dhe pozitive. Por kërcimi më i madh është në ndërtimtari, plot 21,9 për qind, ndërsa rritja e rregulluar sezonalisht e gjithë ekonomisë është 4 për qind. Vetë Mickoski në tubim tha se rritja duhet të vazhdojë dhe „rezultatet të ndihen më shumë - në paga më të larta“. Me këtë do të pajtoheshin edhe kritikët e tij më të zëshëm. Pyetja është vetëm kur.