Marko Kutliq luan në Fabrique Le Supper Club në Split më 3 tetor, me fillim në orën 20:00. Kjo është një nga stacionet e turneut të tij vjeshtor nëpër Kroaci, që përveç Splitit përfshin edhe Osijekun, Pozhegën dhe Zagrebin.

Kutliqi ka lindur më 18 maj 1995 në Sllavonski Brod. Rrugën muzikore e nisi si fëmijë, duke kënduar në koret e kishës dhe duke bërë aranzhime të veta për këngë që i publikonte në internet. Publiku i gjerë e njohu si frontmen i grupit Pravila igre dhe me hitin „Nebo na mojoj strani“, ndërsa karrierën solo e nisi në vitin 2017 me këngët „Srce se spasilo“, „Samo ljubav“ dhe „Uz nju“. Në atë periudhë fitoi edhe çmimin Porin për interpretuesin më të mirë të ri.

Pastaj erdhi kthesa që pak kush në rajon do ta bënte. Pas dy albumeve solo thjesht u zhduk nga skena, kurse publiku mësoi se po luante si këngëtar rruge nëpër qytetet italiane. Një video nga Triestja, ku u luan kalimtarëve hite vendëse dhe të huaja, i befasoi edhe ata që e ndiqnin. Më vonë zbuloi se kishte udhëtuar me një furgon të verdhë, në të cilin një kohë edhe jetoi, duke luajtur nëpër rrugët e qyteteve evropiane.

Këtë vit u kthye te Dora me këngën „Neotudivo“ dhe në finale përfundoi i nënti. Një këngëtar që nga çmimi Porin shkoi të luante në rrugë, e pastaj u kthye te përzgjedhja kombëtare për Eurovizionin, ka një biografi që rrallë haset në një rajon ku karriera zakonisht mbrohet e nuk braktiset. Biletat përmes entrio.hr shkojnë deri në 22 euro, pra rreth 1.355 denarë.