Mickoski e pranon vetingun, por me kusht: së pari opozita të përgjigjet për nenin 353, Dubain dhe jahtin në Paliuri

Veting do secili. Të paktën kështu tingëllon këtë javë. LSDM në platformën e saj të re programore paralajmëron „veting deri në rrënjë“, ndërsa kryeministri Hristijan Mickoski thotë se nuk ka asnjë problem me këtë - le të zgjerohet edhe te familjet, e nëse duhet edhe poligraf. Vetëm se, së pari le të përgjigjet opozita.

Çfarë propozon opozita

LSDM në platformën „Shteti yt - shansi yt“ premton kontroll të prejardhjes së pasurisë së të gjithë funksionarëve nga pavarësia në vitin 1991 deri më sot dhe konfiskim të asaj që është fituar në mënyrë të paligjshme. Pastaj veting edhe në gjyqësor, me kontroll të pasurisë dhe integritetit të gjyqtarëve dhe prokurorëve, si dhe heqje të mbrojtjeve ligjore dhe imunitetit. Lideri Venko Filipçe thotë se ligji do t'i përfshinte të gjithë funksionarët pa përjashtim, përfshirë edhe vetë atë, ndërsa kontrollin do ta bënin ekspertë të huaj.

Çfarë përgjigjet pushteti

Mickoski fillimisht tha se për veting nuk duhet pritur ligji. „Le të ketë projektligj, askush nuk e kontestion këtë. Por edhe tani DAP mund të bëjë veting“, deklaroi ai në Shuto Orizarë, duke numëruar „viza të arta në destinacione ekzotike si Dubai“, „jahte të shtrenjta në bregdetin egje“ dhe vetura të shtrenjta në pronësi të firmave që merrnin tendera për qymyr. Pastaj e ofroi poligrafin, „që atje secili prej politikanëve të thotë sa ka vjedhur, si ka vjedhur, nga ata të opozitës, natyrisht“.

Një ditë më vonë, në një intervistë televizive, toni ishte i njëjtë. Ai dhe familja e tij, thotë, ishin kontrolluar plotësisht që kur në pushtet ishin LSDM dhe BDI. „Por kjo nuk është e rëndësishme“, vazhdoi kryeministri, dhe i vendosi kushtet e tij në formë pyetjesh: pse ata që besojnë në veting e ndryshuan Kodin Penal „me flamur evropian“ dhe e fshinë nenin 353, si fitohet viza e artë në Dubai, çfarë ndikimi pati „vitamina D3 në jahtin në Paliuri“ dhe „si adoleshentët bëhen pronarë të qendrave tregtare“.

Veting - por për të tjerët

Nëse hiqet retorika, mbetet kjo: opozita do një ligj që do t'i kontrollojë të gjithë, me të huaj që do ta udhëheqin procesin. Pushteti thotë se mjetet ekzistojnë tashmë, por menjëherë pas kësaj thotë edhe kë pret ta kapë poligrafi. Të dyja palët e duan vetingun, por secila është e bindur se në fund do të bjerë tjetra.

Ndërsa DAP, së cilës kryeministri ia hedh topin, sipas fjalëve të tij i ka të gjitha mjetet që tani. Nëse mund të kontrollojë „menjëherë“, siç thotë Mickoski, pse për këtë duhej pritur platforma programore e dikujt?

Kryeministri, ndryshe, nuk i përjashtoi as zgjedhjet e parakohshme. Qeveria ka mandat katërvjeçar, thotë ai, por nëse opozita kërkon, janë të gatshëm. „Në politikë kurrë mos thuaj kurrë.“