Mbreti i Esvatinit përgatitet të marrë bashkëshorten e shtatëmbëdhjetë: monarku i fundit absolut në Afrikë ndaloi martesën nën 18 vjeç, e pastaj e anashkaloi ligjin e vet

Msvati III është 58 vjeç, në fron është që nga viti 1986, kur ishte vetëm 18, dhe sipas raporteve përgatitet të martohet për të shtatëmbëdhjetën herë. Nusja quhet Nontokozo dhe është e bija e Injazi Lvezulut, prijësit të kishës Shembe. Portali lokal Swaziland News publikoi se mbreti e ka paguar tashmë shpërblimin tradicional për familjen e nuses, që sipas zakonit svazi do të thotë se fejesa është lidhur. Oborri mbretëror për momentin nuk konfirmon asgjë.

Kjo nuk është histori për romancë, por për pushtet. Esvatini, ish-Svazilendi, është vend prej 17.364 kilometrash katrorë mes Mozambikut dhe Republikës së Afrikës së Jugut - më i vogël se Maqedonia - dhe konsiderohet si monarkia e fundit absolute në Afrikë. Kjo do të thotë se fjala e mbretit është ligj. Në vitin 2018 ai vetë ia ndryshoi emrin shtetit, sepse bota vazhdimisht e ngatërronte Svazilendin me Zvicrën.

E ligji ka një anë të pakëndshme. Sipas raporteve, vetë Msvati nxori rregull që ndalon martesën nën 18 vjeç, e pastaj e anashkaloi së paku dy herë - me nuse 16 dhe 17 vjeçare. Kur rregulli vlen për nënshtetasit, e jo edhe për atë që e nënshkroi, sa vlen nënshkrimi?

Statistika familjare tingëllon si nga një shekull tjetër. I ati, mbreti Sobuza II, të cilin e quanin „Dielli“, kishte së paku 70 bashkëshorte dhe më shumë se 200 pasardhës. Msvati lindi i 67-ti në vargun e gjatë të trashëgimtarëve dhe pas vdekjes së të atit, nëpër intriga oborri, në moshën 18 vjeçare u shpall sundimtar absolut. Sot ka më shumë se 200 vëllezër e motra dhe më shumë se 30 fëmijë.

Pallati nuk është përrallë për çdo grua që hyn në të. Në vitin 2004 dy bashkëshorte ikën - njëra në Johanesburg, tjetra në Londër. Nomcebo Zuma, e bija e ish-presidentit jugafrikan Xhejkob Zuma, e braktisi pallatin sepse nuk ndihej e dashur, dhe u kthye vetëm pas negociatash. Notando Dube, të cilën mbreti e vuri re si finaliste e një konkursi bukurie për adoleshente dhe me të cilën u martua në vitin 2005, më vonë u gjend në skandal me ministrin e Drejtësisë Ndumiso Mamba, mik i ngushtë i mbretit.

Dasma e re vjen pak pas vdekjes së motrës së mbretit në shtator. Oborri hesht, ndërsa lajmet vijnë nga mediat lokale. Ballkani e njeh mirë pamjen kur një njeri e mban gjithë shtetin në dorë. Në Esvatini të paktën askush nuk shtiret se është ndryshe.