Liska, Dushko, Svetle, Simba, Belka, Poko, Noli dhe Sharka. Këta nuk janë numra në evidencë, por emra që i njeh gjithë lagjja. Dhe të gjithë, sipas Shoqatës për Mbrojtjen e Kafshëve „Anima Mundi“, janë zhdukur nga rrugët e Prilepit në shtator.

Qytetarët nga lagjja Toçila iu drejtuan shoqatës sepse askush nuk po u thoshte ku janë qentë e tyre. Liska, një qen i qetë dhe i shoqërueshëm që e ruante lagjen, sipas dëshmive është kapur më 17 shtator. Qytetarët shkuan menjëherë në strehimore me qëllim që ta adoptonin zyrtarisht. Liska nuk ishte aty. Sipas njerëzve që ishin brenda, kafazet ishin bosh - edhe pse ditët e mëparshme ishte vënë re kapja e qenve nëpër qytet.

„Ku janë qentë? Kush i ka kapur dhe ku janë dërguar?“, pyesin nga „Anima Mundi“. Sipas tyre, një pjesë e qenve të zhdukur ishin sterilizuar tashmë dhe kishin shenja në vesh, ndërsa për disa ka informacione se kanë pronarë.

Shoqata ka kërkuar nga NPK „Komunalec“ - Prilep evidencën për të gjitha kapjet dhe transportet mes 1 dhe 23 shtatorit: lokacionet, pranimin në strehimore, trajtimin veterinar, adoptimin ose kthimin në terren. Informacione janë kërkuar edhe nga Agjencia e Ushqimit dhe Veterinarisë, e cila tashmë ka kryer mbikëqyrje të jashtëzakonshme inspektuese, si dhe nga MPB-ja dhe Komuna e Prilepit.

Sipas „Anima Mundi“, pastrimi i një lokacioni nga qen të njohur dhe të sterilizuar në fakt hap hapësirë për qen të rinj, të pasterilizuar, që askush në lagje nuk i njeh. Me fjalë të tjera, nëse kjo ishte kontroll i popullatës, ai punon së prapthi.

„Anima Mundi“ kujton se çdo qen në sistemin e kontrollit të popullatës duhet të trajtohet sipas Ligjit për Mbrojtjen dhe Mirëqenien e Kafshëve - dhe se qentë nuk mund thjesht të zhduken pa evidencë. Nëse „Komunalec“ e ka evidencën, pse nuk e ka treguar deri tani? E nëse nuk e ka, kush atëherë ka vendosur për fatin e Liskës?