Лиска, Душко, Светле, Симба, Белка, Поко, Ноли и Шарка. Тоа не се бројки во евиденција, туку имиња што ги знае цела маала. И сите, според Здружението за заштита на животните „Анима Мунди“, исчезнале од улиците на Прилеп во септември.

Граѓаните од населбата Точила се обратиле до здружението затоа што никој не им кажувал каде се нивните кучиња. Лиска, мирно и социјализирано куче што го чувала маалата, според сведоштвата била заловена на 17 септември. Граѓаните веднаш отишле во прифатилиштето со намера официјално да ја вдомат. Лиска не била таму. Според луѓето што биле внатре, кафезите биле празни – иако претходните денови било забележано заловување кучиња низ градот.

„Каде се кучињата? Кој ги заловувал и каде се однесени?“, прашуваат од „Анима Мунди“. Според нив, дел од исчезнатите кучиња веќе биле стерилизирани и имале ушни маркици, а за некои постојат информации дека имаат сопственици.

Здружението од ЈКП „Комуналец“ – Прилеп побарало евиденција за сите заловувања и транспорти меѓу 1 и 23 септември: локации, прием во прифатилиштето, ветеринарен третман, вдомување или враќање на терен. Информации се побарани и од Агенцијата за храна и ветеринарство, која веќе извршила вонреден инспекциски надзор, како и од МВР и Општина Прилеп.

Според „Анима Мунди“, чистењето на една локација од познати и стерилизирани кучиња всушност отвора простор за нови, нестерилизирани кучиња што никој во маалата не ги познава. Со други зборови, ако ова било контрола на популацијата, таа работи наопаку.

„Анима Мунди“ потсетува дека секое куче во системот за контрола на популацијата мора да биде третирано според Законот за заштита и благосостојба на животните – и дека кучињата не можат едноставно да исчезнат без евиденција. Ако „Комуналец“ има евиденција, зошто досега не ја покажал? А ако нема, кој тогаш одлучувал за судбината на Лиска?