Këshilli Drejtues i Bashkësisë së Njësive të Vetëqeverisjes Lokale (ZELS) mbajti seancë të rregullt në të cilën, sipas kumtesës, u shqyrtuan një sërë çështjesh aktuale me rëndësi për funksionimin e komunave dhe avancimin e vetëqeverisjes lokale.

Pika më konkrete ishte kërkesa e Odës Ekonomike për ndryshime të Ligjit për taksat komunale. Në seancë, thuhet në kumtesë, „u shkëmbyen mendime për çështjet me rëndësi për komunat dhe ekonominë lokale“. Çfarë ndryshimesh kërkon Oda, çfarë mendojnë komunat dhe nëse ZELS i mbështet - asnjë fjalë.

Këshilli e shqyrtoi edhe tekstin e Memorandumit të bashkëpunimit me Ministrinë e Politikës Sociale, Demografisë dhe të Rinjve dhe me Këshillin Nacional Rinor, si dhe përgatitjet për Kuvendin e Përgjithshëm të ZELS-it, të caktuar për mesin e dhjetorit.

Taksat komunale janë para që i paguajnë qytetarët dhe firmat, ndërsa i mbledhin komunat. Kur biznesi kërkon ndryshime, ndërsa komunat „shkëmbejnë mendime“, publiku ka të drejtë të dijë në anën e kujt do të dalë ZELS. Apo këtë do ta mësojmë vetëm kur ligji të arrijë në Kuvend?