Pesë të mitur me sende të forta rrahën një djalë para shkollës në Rashçe: kush i ruan dyert e shkollës?

Rreth orës 9:40 të mëngjesit, më 11 nëntor, para hyrjes së shkollës fillore në fshatin shkupjan Rashçe, pesë të mitur e pritën moshatarin e tyre. E rrahën edhe me sende të forta. Djali përfundoi me lëndime të rënda trupore.

Sulmin e denoncoi nëna, një grua 37-vjeçare nga Rashçe, ditën tjetër në SPB Shkup. Nga MPB përsërisin fjalinë e njohur: po ndërmerren masa për zbardhjen e rastit. Pesë kundër një, në mëngjes, para derës së shkollës - ndërsa autorët për momentin nuk janë bërë të ditur.

Vetëm disa orë më vonë, rreth orës 12:30, në oborrin e një shkolle fillore në rajonin e Bit Pazarit ndodhi edhe një sulm tjetër. Sipas kallëzimit të babait 45-vjeçar, një grua e kapi për duarsh fëmijën e tij të mitur, ndërsa i biri i saj i mitur e goditi me send të fortë. Nëse kjo konfirmohet, nuk flasim më vetëm për fëmijë që nuk njohin kufi. Flasim për një person të rritur që mbante fëmijën e huaj ndërsa i saj e godiste.

Të dy rastet vijnë vetëm disa ditë pasi Gjykata Themelore Penale Shkup dha aktgjykimin e shkallës së parë për keqtrajtimin brutal të një vajze 13-vjeçare në Gjorçe Petrov, që në mars e tronditi publikun. Katër vajzat e mitura morën masë edukuese institucionale, dërgim në shtëpi edukuese-përmirësuese: dy nga një vit, dy nga tetë muaj. Vendimi nuk është i formës së prerë. Kundër prindërve të tyre u ngritën edhe gjashtë kallëzime penale për lënie pas dore dhe keqtrajtim të fëmijës.

Aktgjykimi është mesazh, por mesazh që mbërrin pasi një fëmijë tashmë është rrahur. Kush i shikon hyrjet e shkollave në orët kur nxënësit hyjnë? Ku janë psikologët dhe pedagogët e shkollave para se rasti të mbërrijë në buletinin policor?

Policia punon për zbardhjen. Deri atëherë, në Rashçe ka një djalë të lënduar rëndë dhe prindër që të hënën sërish do t'i dërgojnë fëmijët në shkollë.