Mickoski nga takimi në Sofje pret bisedë „te kroi“, ndërsa Bullgaria ende nuk është përgjigjur zyrtarisht

Shefi i diplomacisë maqedonase Timço Mucunski dhe kolegia e tij bullgare Velisllava Petrova-Çamova duhet të takohen të enjten në Sofje, në margjinat e konferencës ministrore për Korridorin 8. Duhet - sepse deri dje nuk kishte përgjigje zyrtare nga Bullgaria për kërkesën që Shkupi e dërgoi qysh të premten.

Iniciativa erdhi pas vizitës së presidentes së Komisionit Evropian Ursula fon der Lajen në Shkup. Kryeministri Hristijan Mickoski atëherë tha se do ta dëgjojë këshillën e saj dhe do të kërkojë takim të ministrave. Ministria bullgare e Punëve të Jashtme, nga ana e saj, përmes mediave njoftoi se në kuadër të forumit „do të ketë mundësi“ për takim bilateral, si pjesë e „dialogut të rregullt mes dy vendeve“.

Mickoski nuk e fsheh se nuk pret shumë. „Duke pasur parasysh sjelljen e Sofjes zyrtare, nuk pres konfirmim, nuk pres asgjë, pres ndonjë dialog „pull aside“, ne e quajmë te kroi, dhe kaq do të jetë afërsisht“, deklaroi kryeministri.

Opozita thotë se pikërisht ky është problemi. „Edhe para se të ndodhë ai takim, shohim strategji për minimin e atij takimi“, tha Andrej Zhernovski, duke e akuzuar kryeministrin se dëshiron ta kthejë Maqedoninë prapa. Nga Sofja, ndërkaq, presidentja bullgare Jotova porositi se nuk duhet të ketë ultimatume nga ana maqedonase.

Kështu duket diplomacia mes Shkupit dhe Sofjes: notë nga njëra anë, përgjigje përmes mediave nga tjetra, dhe një kryeministër që para shtrëngimit të parë të duarve e quan takimin bisedë te kroi. Nëse biseda është vërtet hapi i parë drejt zhbllokimit të integrimeve evropiane, siç e përshkruan Mickoski dhe Fon der Lajen, a dëshiron vërtet dikush në dy kryeqytetet që ky hap të ketë sukses?