Epruvetë e thyer me murtajë dhe laborante e vdekur në Irkutsk: Moska thotë „stabile“, Uashingtoni kërkon përgjigje

Darja Shipilova ishte 28 vjeçe dhe punonte në Institutin Kërkimor për Luftën kundër Murtajës në Irkutsk, në Siberinë juglindore. Më 25 shtator, sipas mediave lokale, ajo theu një epruvetë me shkaktarin e murtajës pulmonare. Më 29 shtator u shtrua në spital me simptoma të pneumonisë së rëndë. Natën mes 1 dhe 2 tetorit vdiq. Shkaku zyrtar: „pneumoni me etiologji të panjohur“.

Etiologji e panjohur - në një institut puna e vetme e të cilit është pikërisht murtaja. Kjo është fjalia që i ndezi thashethemet, dhe është vështirë të fajësosh njerëzit që e lexuan dy herë.

Autoritetet ruse pohojnë se nuk kanë gjetur prova që sëmundjen e saj e ka shkaktuar ndonjë nga patogjenët me të cilët punonte dhe se situata është nën kontroll. Rospotrebnadzor, shërbimi për mbikëqyrje sanitare, njoftoi se në rrjetet sociale qarkullojnë dezinformata për një rast të ri murtaje dhe se gjendja sanitaro-epidemiologjike në rajonin e Irkutskut është „stabile“. Në të njëjtën kohë, spitali ku u trajtua është vënë në karantinë, ndërsa rreth 200 njerëz që kanë qenë në kontakt me të janë nën mbikëqyrje të rreptë mjekësore.

Karantina e një spitali të tërë dhe dyqind njerëz nën mbikëqyrje nuk janë masa për „asgjë“. Nëse gjithçka është stabile, pse duket si gjendje e jashtëzakonshme?

Uashingtoni kërkon transparencë, Kremlini „nuk ka informacione“

Sekretari amerikan i Shtetit Marco Rubio më 6 tetor i kërkoi Rusisë më shumë informacione për infeksionin. „E bëjmë thirrje Rusinë të jetë transparente dhe t'i japë botës më shumë informacione, që secili të mund të reagojë si duhet“, deklaroi Rubio. Një zyrtar i paidentifikuar i Departamentit të Shtetit i tha CNN-it se autoritetet amerikane kishin kontaktuar me qeverinë ruse edhe para kësaj, ndërsa „Washington Post“ më 7 tetor raportoi se SHBA po përgatit një notë zyrtare diplomatike për Moskën. Zëdhënësi i Kremlinit Dmitrij Peskov u përgjigj se Kremlini nuk ka informacione për një notë të tillë.

Komisioni Evropian dhe vendet anëtare të BE-së gjithashtu caktuan bisedime për dyshimin se në Siberi ka shpërthyer murtaja pulmonare. „Daily Mail“ britanik, duke iu referuar një pjese të mediave ruse, pohon se ka vdekur edhe një person i dytë që dyshohet se është infektuar - pohim që askush nuk e ka konfirmuar zyrtarisht. As Brukseli, pra, nuk është krejt i bindur nga fjala „stabile“.

Ballkani e kujton Çernobilin

Në prill të vitit 1986 Moska heshti me ditë për Çernobilin, ndërsa reja radioaktive tashmë po kalonte mbi Evropë, edhe mbi Ballkan. Kjo nuk do të thotë se Irkutsku është Çernobil i ri - murtaja pulmonare sot shërohet me antibiotikë nëse kapet me kohë. Por modeli është i njohur: së pari „s'ka asgjë“, pastaj „nën kontroll“, ndërsa e vërteta mbërrin e fundit.

Një shkencëtare e re ka vdekur, 200 njerëz presin rezultate, ndërsa më me zë flasin diplomatët. Kush do të japë llogari nëse „etiologjia e panjohur“ del shumë mirë e njohur?