„Stiv Naumov“ i rinovuar për rreth 10 milionë euro: një muaj më vonë ujë nëpër mure, ndërsa MASH numëron shamitë e lagura

Konvikti studentor i rindërtuar „Stiv Naumov“ në Shkup u vu në përdorim në fund të shtatorit, me paralajmërime për standarde evropiane, instalime të reja dhe efikasitet më të mirë energjetik. Nuk kaloi as një muaj, e studentët raportojnë ujë që rrjedh nëpër mure, lagështi, radiatorë të ftohtë dhe grila të dëmtuara - defekte që, sipas tyre, i vunë re që gjatë vendosjes.

Për rinovimin e konviktit u parashikuan rreth 10 milionë euro. Rindërtimi i „Stiv Naumovit“ dhe „Kuzman Josifovski-Pitusë“ bashkë është pjesë e një investimi prej rreth 20 milionë eurosh. Dhe akomodimi nuk është i lirë: participimi mujor në „Stiv Naumov“ është 6.600 denarë, pothuajse dyfishi i 3.410 denarëve që paguhen në konviktet e kategorisë së dytë. Për nëntë muaj qëndrim kjo është diferencë prej 28.710 denarësh për student - diferencë që u arsyetua pikërisht me kushtet e përmirësuara.

Ministria numëron gabimet e të tjerëve

Përgjigja e Ministrisë së Arsimit dhe Shkencës ishte një listë. Udhëheqja e konviktit, theksojnë nga MASH, u përball me kanalizim të bllokuar nga shamitë e lagura të hedhura, sistem alarmi të aktivizuar nga ushqimi i harruar në mikrovalë të ndezur dhe nga një cigare e ndezur në dhomë, radiator të shkulur dhe vetura të parkuara në hapësirat e gjelbra. Një pjesë e problemeve, thonë, mund të lindin vetvetiu, por disa janë shkaktuar nga përdoruesit. Objekti është në afat garancie, kontraktori po ndërhyn, ndërsa sipas ministrisë të gjitha problemet e regjistruara deri tani janë tejkaluar.

Shamitë e lagura dhe cigarja janë probleme reale. Por uji nuk rrjedh nëpër mur për shkak të mikrovalës. Nëse objekti është në afat garancie, kush i pranoi punimet dhe kush e bëri mbikëqyrjen e realizimit? Për këtë pyetje deri tani nuk ka përgjigje.

Opozita numëron paratë

Opozita menjëherë e ktheu konviktin në shënjestër politike. Rinia Socialdemokrate pyeti „për çfarë u shpenzuan milionat“ dhe kërkon publikimin e plotë të të gjitha shpenzimeve dhe kontratave të lidhura me projektin. Levica flet për „punë të dobët“ dhe pretendon se i vijnë informacione për tuba të çarë, baltë nga rubinetet dhe periudha pa rrymë - pretendime që ministria nuk i konfirmoi.

Deri tani nuk ka vlerësim të pavarur ekspertësh se sa të përhapura janë defektet, as konfirmim se janë të pranishme në gjithë konviktin. Por studentët që paguajnë pothuajse dyfish më shumë meritojnë diçka më të fortë se një apel për „përdorim të përgjegjshëm të hapësirave“. Dimri nuk pret afatet e garancisë.