Deponia „Bukovo” digjet për kushedi sa herë, ndërsa tymi sërish arrin te Krushja: tetë mijë metra kub dhé nuk e penguan

Deponia „Bukovo" po digjet sërish. Banorët e fshatrave përreth, sidomos të Krushjes, sërish zgjohen në tym të dendur dhe në erën e plastikës së djegur që nuk lahet as nga perdet as nga mushkëritë. Dhe sërish të gjithë janë në terren - ekipet e NP „Komunalec" nga Ohri dhe njësia territoriale zjarrfikëse po bëjnë prerje mbrojtëse dhe po hedhin dhé mbi vatrat e zjarrit.

Dhé mbi zjarr. Kjo është teknologjia e vitit 2026 te pika më e madhe ekologjike në rajonin Jugperëndimor.

Nga ndërmarrja komunale informojnë se vazhdimisht po dërgohen sasi shtesë dheu për ta mbytur tymin dhe se shërbimet mbeten në terren për të parandaluar rindezjen nën shtresat sipërfaqësore të mbeturinave. Ajo „nën shtresat sipërfaqësore" është fraza kyçe - zjarri në deponi nuk shuhet, ai mbulohet dhe pret.

Nga ndërmarrja theksojnë se këtë vit në „Bukovo" janë sjellë mbi tetë mijë metra kub dhé për mbulim dhe stabilizim të pjesëve të deponisë, si dhe për zvogëlimin e mundësisë së shfaqjes dhe përhapjes së zjarrit. Tetë mijë metra kub dhé - dhe deponia megjithatë u ndez.

Sa i përket shkakut, autoritetet nuk e përjashtojnë as vënien e qëllimshme të zjarrit. Shkakun e vërtetë do ta konstatojnë institucionet sipas procedurës përkatëse. Deri atëherë, si zakonisht, askush nuk ka emër.

Aktivistët e thonë atë që institucionet e anashkalojnë

Nga nisma „Lamtumirë Bukovo" janë më të ashpër. Ata prej vitesh paralajmërojnë se zjarret e shpeshta janë pasojë e drejtpërdrejtë e trajtimit dhe menaxhimit të papërshtatshëm të mbeturinave, dhe se ndërhyrjet e pjesshme vetëm e shtyjnë problemin - ndërsa popullata vendase e paguan me shëndetin e vet.

„Përsëritja e zjarreve është rezultat i trajtimit të papërshtatshëm të mbeturinave", porosit aktivistja Dragana Karashova, duke kërkuar parandalim urgjent dhe respektim të afateve të vendosura.

Afatet. Aty është edhe përgjigjja e vërtetë, edhe problemi i vërtetë. Mbyllja e përhershme e „Bukovos" varet nga ndërtimi i qendrës rajonale për menaxhim me mbeturina në Novaci. Sipas njoftimeve të fundit nga institucionet përgjegjëse, projekti po ecën sipas dinamikës së parashikuar, ndërsa pritet që deri në fund të vitit 2027 të mbyllen të gjitha deponitë jostandarde në rajon.

Fundi i vitit 2027. Do të thotë edhe së paku dy verë në të cilat Krushja do të numërojë ditë me tym. Nëse dinamika respektohet - ndërsa pyetja që askush nga përgjegjësit nuk e shtron me zë të lartë është çfarë do të ndodhë nëse nuk respektohet. Deri atëherë, përgjigjja e institucioneve mbetet e njëjtë: edhe më shumë dhé.