Депонијата „Буково” пак гори. Жителите на околните села, посебно Крушје, пак се будат во густ чад и во миризба на изгорена пластика што не се мие ни од завеси ни од бели дробови. И пак сите се на терен – екипите на ЈП „Комуналец” од Охрид и Територијалната противпожарна единица прават заштитен пресек и нанесуваат земја врз жариштата.

Земја врз оган. Тоа е технологијата на 2026 година кај најголемата еколошка точка во Југозападниот регион.

Од комуналното претпријатие информираат дека континуирано се доставуваат дополнителни количини земја за да се задуши чадот, и дека службите остануваат на терен за да спречат повторно разгорување под површинските слоеви отпад. Тоа „под површинските слоеви” е клучната фраза – оган во депонија не се гаси, тој се покрива и чека.

Од претпријатието наведуваат дека оваа година на „Буково” се донесени над осум илјади кубни метри земја за покривање и стабилизација на делови од депонијата, како и за намалување на можноста за појава и ширење на пожар. Осум илјади кубни метри земја – а депонијата сепак се запали.

За причината, надлежните не го исклучуваат ни намерното подметнување. Вистинската причина ќе ја утврдат институциите по соодветна постапка. Дотогаш, како и обично, никој нема име.

Активистите го кажуваат она што институциите го заобиколуваат

Од иницијативата „Збогум Буково” се поостри. Тие со години предупредуваат дека честите пожари се директна последица на несоодветното третирање и управување со отпадот, и дека парцијалните интервенции само го одложуваат проблемот – додека локалното население го плаќа со сопственото здравје.

„Повторувањето на пожарите е резултат на несоодветното третирање со отпадот”, порачува активистката Драгана Карашова, барајќи итна превенција и почитување на поставените рокови.

Рокови. Тука е и вистинскиот одговор, и вистинскиот проблем. Трајното затворање на „Буково” зависи од изградбата на регионалниот центар за управување со отпад во Новаци. Според последните најави од надлежните институции, проектот се одвива според предвидената динамика, а очекувањата се дека до крајот на 2027 година ќе се затворат сите нестандардни депонии во регионот.

Крајот на 2027 година. Значи уште најмалку две лета во кои Крушје ќе брои денови со чад. Ако динамиката се почитува – а прашањето кое никој од надлежните не го поставува гласно е што ќе се случи ако не се почитува. Дотогаш, одговорот на институциите останува ист: уште земја.