Deponia e egër në Radushë, në Komunën e Sarajit, është pastruar dhe në vend të saj janë mbjellë fidanë. Këtë e njoftoi kryetari Muhamed Elmazi, i cili thotë se pastrimi ishte kërkesë e banorëve dhe premtim i dhënë në fushatën zgjedhore.

„Aty ku dje kishte mbeturina, sot mbjellim jetë“, shkroi Elmazi. Qëllimi, sipas tij, është që vendi që dikur ishte simbol i mbeturinave të bëhet hapësirë e pastër dhe e gjelbër për komunitetin.

Premtimi është mbajtur dhe kjo duhet thënë. Por përvoja me deponitë e egra dihet: sipërfaqja e pastruar shpejt bëhet deponi e re nëse nuk ka mirëmbajtje të rregullt, mbikëqyrje dhe sistem funksional për grumbullimin e mbeturinave. Fidanët janë shenjë e mirë. Kontejneri dhe kamioni që vjen rregullisht janë edhe më të mirë.

Prandaj pyetja për Komunën është konkrete: ku do t'i hedhin banorët e Radushës mbeturinat nga nesër? Nëse për këtë nuk ka përgjigje, pas një viti do të shkruajmë sërish për të njëjtin vend.