Prokuroria polake do ta hetojë masakrën në Krakov si terrorizëm: sulmuesi 24-vjeçar kishte leje të ligjshme për armë

Prokuroria polake do ta hetojë masakrën në Krakov si vepër penale me natyrë terroriste. 24-vjeçari Michał O. të shtunën pasdite hyri me veturë në sheshin kryesor të Krakovit dhe hapi zjarr ndaj kalimtarëve. Vrau gjashtë njerëz dhe plagosi edhe 15 të tjerë, mes tyre edhe dy policë. Pastaj policia në shtëpinë e tij në Ostrowiec Świętokrzyski gjeti trupat e prindërve dhe të motrës së tij. Rrethanat e vdekjes së tyre gjithashtu janë nën hetim.

„Kjo ende nuk do të thotë se motivi terrorist është konfirmuar“, sqaroi zëdhënësi i prokurorisë Tomasz Waszczuk. Sulmuesi, të cilin policia e plagosi gjatë arrestimit, për shkak të plagëve të rënda ende nuk është marrë në pyetje dhe është nën mbikëqyrje policore në spital, ku u operua. Për veprat që i ngarkohen parashikohet edhe burgim i përjetshëm.

Këtu fillojnë pyetjet që Polonia do të duhet t'ia bëjë vetes. Michał O. kishte leje për armë dhe nuk ishte i dënuar. Gjuajti me një pushkë gjysmëautomatike të ngjashme me AR-15, kishte edhe pistoletë, ndërsa në veturë u gjetën edhe armë e municion të tjerë. Ministri i Punëve të Brendshme Marcin Kierwiński thotë se sulmuesi përfaqësonte „qëndrime shumë radikale“, ndërsa përmendet edhe magjepsje me ideologjitë e së djathtës ekstreme - edhe pse hetuesit ende nuk kanë konfirmuar se ky ishte motivi. Nëse një njeri me qëndrime të tilla zotëron ligjërisht armë të tilla, çfarë saktësisht kontrollon sistemi që lëshon lejet?

Policia reagoi shpejt. Patrulla e parë filloi të ndërhyjë 23 sekonda pas lajmërimit, ndërsa të shtënat e para drejt sulmuesit u qëlluan pas tri minutash. Ndërsa ikte, Michał O. u përplas me një veturë tjetër, doli dhe qëlloi ndaj policëve, të cilët iu kundërpërgjigjën. Një nga policët e plagosur, Jakub Kulik, ka tri plagë nga armë zjarri dhe është në gjendje shumë të rëndë. „Reagimi rrufe e parandaloi një masakër shumë më të madhe“, tha Kierwiński.

Mes të lënduarve janë edhe karrocierët që çdo ditë i shëtisin turistët nëpër sheshin kryesor - dy prej tyre po luftojnë për jetën. Mes të vdekurve është edhe një shtetas britanik. Qyteti i mbylli stacionet e karrocave turistike, ndërsa presidenti Karol Nawrocki shpalli zi kombëtare dyditore; në Krakov ajo do të zgjasë deri të mërkurën. Policia e kreu punën e saj për pak minuta. Tani është radha e institucioneve që ia lëshuan lejen të shpjegojnë çfarë shihnin - dhe çfarë jo.