Që nga fillimi i pushtimit në vitin 2022, urat e mëdha mbi Dnipro në Kiev qëndronin të paprekura. Këtë javë kjo mbaroi. Që nga e enjtja dronët rusë e goditën disa herë Urën Jugore, ndërsa të shtunën në mëngjes erdhi radha edhe e asaj Veriore. Kryebashkiaku Vitali Klitschko konfirmoi se në Urën Veriore janë dëmtuar rruga dhe rrjeti i kontaktit për trolejbusët, ndërsa trafiku nga bregu i majtë në të djathtin është ndalur.

Kjo ishte tashmë goditja e katërt ndaj urave të Kievit për vetëm dy ditë. Ura Jugore nuk është kalim i zakonshëm: në dy nivele mban autostradë dhe linjën e gjelbër të metrosë, e përveç kësaj edhe gazsjellës me presion të lartë dhe kabllo kryesore energjetike. Kur një dron rus me reaksion shpërtheu ndërsa mbi urë kalonte një tren i mbushur i metrosë, tragjedia nuk ndodhi vetëm sepse shoferi e vuri re dronin, e përshpejtoi trenin dhe i nxori pasagjerët një sekondë para detonimit. Pluhuri nga vala goditëse megjithatë hyri në vagonë nëpër ventilim.

Pse ura, nëse nuk mund t'i rrëzojnë?

Eksperti i aviacionit dhe ish-inxhinier në „Antonov“ Kostiantyn Kryvolap është i qartë: rrëzimi i një ure të tillë me një ngarkesë eksplozive prej 50 kilogramësh është praktikisht i pamundur. „Për një urë të kësaj madhësie, goditje të tilla janë si pickim mushkonje“, thotë ai. Por qëllimi, sipas tij, nuk është betoni. Qëllimi është logjistika, lëvizja dhe nervat e njerëzve.

Ura nuk duhet të bjerë që qyteti të ndalet. Mjafton një dëmtim i një kalimi të kombinuar dhe papritur zhduken edhe rruga, edhe metroja, edhe instalimet. Rezultatin e panë të gjithë: kievasit që e kalojnë Dnipron në këmbë ndërsa mbi ta fluturojnë dronë. Ballkani e njeh këtë pamje - Novi Sadi në vitin 1999 mbeti pa urat e veta mbi Danub.

Zgjedhja e momentit nuk është e rastësishme. Vetëm disa ditë para goditjeve, Kievi njoftoi se përmes inteligjencës kishte ardhur te plane të detajuara ruse për sulme dimërore ndaj infrastrukturës kritike - rrymë, ngrohje, ujë, kanalizim, madje edhe interkonektorët përmes të cilëve Ukraina importon rrymë nga Evropa. Kievi deri tani ka ngritur më shumë se 200 konstruksione mbrojtëse rreth objekteve energjetike. Goditjet ndaj urave tregojnë se Moska e zgjeron listën e gjithçkaje që u mundëson qytetarëve një jetë normale.

Në të njëjtat ditë, një dron „Geran-4“ goditi shkollën numër 12 në lagjen Solomjanski të Kievit, në momentin kur brenda kishte më shumë se 100 nxënës dhe 60 mësues. Të gjithë ishin tashmë në strehimore. Koka luftarake prej 50 kilogramësh e shpoi dyshemenë mes katit të dytë dhe të tretë dhe ra në shkallë - pa shpërthyer. Që nga fillimi i pushtimit, në Kiev janë dëmtuar 334 institucione arsimore, prej të cilave 165 shkolla.

Moska kërcënon edhe diplomatët

Ministria ruse e Punëve të Jashtme sërish u bëri thirrje shtetasve të huaj, përfshirë edhe personelin diplomatik, të mos qëndrojnë në Ukrainë dhe të mos udhëtojnë atje. Përgjegjësinë e plotë për „pasojat e mundshme të padëshiruara“, deklaruan ata, do ta mbajnë ata që e injorojnë paralajmërimin. „Forcat e armatosura ruse do të vazhdojnë të kryejnë goditje masive hakmarrjeje“, thuhet në njoftim. Vladimir Putin goditjet i paraqet si përgjigje ndaj sulmeve ukrainase ndaj rafinerive ruse, edhe pse Moska e para filloi ta shkatërrojë rrjetin energjetik.

Një diplomat i lartë i paidentifikuar deklaroi se po përgatiten plane rezervë sipas të cilave ambasadat, nëse nevojitet, do të zhvendoseshin në Lviv ose në Poloninë lindore - por vetëm nëse Rusia fillon t'i godasë qëllimisht misionet e huaja. Ministria ukrainase e Punëve të Jashtme thotë se nuk ka marrë asnjë njoftim për zhvendosje.

Kjo nuk është temë abstrakte as për Shkupin. Në një sulm raketor rus ndaj Kievit në dhjetor 2024 u dëmtuan ambasadat e Shqipërisë, Argjentinës, Palestinës, Maqedonisë, Portugalisë dhe Malit të Zi. Në maj të këtij viti u dëmtua edhe rezidenca e ambasadorit shqiptar. Kur Moska thotë se disa „me vetëdije ekspozohen ndaj rrezikut vdekjeprurës“, kujt saktësisht i flet?

Klitschko e tha pa zbukurime: „Nuk mund të shtiremi më se jetojmë si në kohë paqeje. Armiku po e shkatërron Kievin.“ Qyteti përballet me një kombinim të rrezikshëm - mungesë akute të interceptorëve „Patriot“ për raketat balistike dhe një gjeneratë të re dronësh rusë më të shpejtë me reaksion, të cilët rrëzohen më vështirë. Dronët e rinj interceptorë tashmë përdoren, por deri te mbrojtja në shkallë që do të kishte kuptim për kryeqytetin mund të kalojnë javë ose muaj. Dimri nuk do të presë aq.