Zhernovski e quajti raportin e KE-së „katastrofal“, VMRO-DPMNE u përgjigj me fyerje në vend të përgjigjeve

Komisioni Evropian shkroi një raport. Shkupi e lexoi si dy. Një ditë pas publikimit, LSDM dhe VMRO-DPMNE e shfrytëzuan Raportin e KE-së për hakmarrje të ndërsjellë - dhe asnjë palë nuk shpjegoi çfarë konkretisht do të bëjë për atë që Brukseli ka shënuar.

Të shtënën e parë e bëri Andrej Zhernovski, sekretar për bashkëpunim ndërkombëtar i LSDM-së. Raporti për të është „katastrofal“ dhe „kritikë e drejtpërdrejtë për qeverisjen e VMRO-së“. „Kemi zero përparim në shtatë fusha“, tha ai, duke numëruar korrupsionin, prokurimet publike dhe lirinë e medias. Gjyqësori, sipas tij, është „nën rrethim politik dhe pa para“, ndërsa Kuvendi e keqpërdor procedurën e shkurtuar për miratimin e ligjeve. Shtoi edhe se po të ishte vendi në BE, nuk do të kishte skandal si „Alta Banka“.

VMRO-DPMNE u përgjigj me kumtesë në të cilën për politikën nuk ka pothuajse asgjë. Zhernovski është „ambasador i dështuar, njeri që 20 vjet është në llogari të shtetit“. LSDM është në „qorrsokak intelektual dhe politik“, „fabrikë gënjeshtrash dhe spekulimesh“. Partia pretendon se Zhernovski nuk e di çfarë do të thotë akronimi NATO, ndërsa opozitën e akuzoi se me presionin ndaj Bankës Popullore për „Alta Bankën“ krijon „krizë artificiale“ që bankën ta marrë një biznesmen i afërt me LSDM-në - pretendim për të cilin në kumtesë nuk ka asnjë dëshmi.

Për raportin, partia në pushtet iu referua fjalëve të euroambasadorit Mihalis Rokas për përparim në digjitalizim, shkencë, arsim dhe sundim të ligjit. Dhe përfundoi me porosinë: „Qytetarët le të jenë të qetë. Derisa Hristijan Mickoski është kryeministër dhe VMRO-DPMNE në pushtet, rroga dhe pensione do të ketë, e bankat nuk do të falimentojnë.“

Kjo është fjali që tingëllon si garanci, por është mesazh politik. Bankat i mbikëqyr Banka Popullore, jo partia. Ndërsa klientët e „Alta Bankës“ pa kartelë këtë javë mund të tërheqin më së shumti 20.000 denarë në dy javë - nga paratë e veta.

Në gjithë këtë shkëmbim u zhduk ajo që është në vetë raportin. Korrupsioni është pa përparim. Gjykatave u mungojnë mbi dyqind gjyqtarë, ndërsa pranimi i kandidatëve të rinj është anuluar për shkak të buxhetit. Kodi Zgjedhor nuk është harmonizuar me rekomandimet e OSBE/ODIHR. Këto janë detyra për pushtetin dhe opozitën së bashku. Kush prej tyre do të ulet në tryezë për to - në vend se para mikrofonit?