1.696 zjarre për tre muaj, ndërsa 1.627 prej tyre dogjën bar, kashtë dhe deponi

Vera mbaroi, ndërsa shifra mbeti: 1.696 zjarre në hapësirë të hapur në territorin e vendit, nga 1 qershori deri më 31 gusht. Këtë e njoftoi drejtori i Qendrës për menaxhim me kriza, Muhamed Ali.

Nga to 69 ishin pyjore. Të tjerat 1.627 dogjën bar të thatë, kashtë, pyll të degraduar me trungje të ulëta dhe deponi. Ky raport është më i rëndësishëm se shifra e përgjithshme, sepse thotë diçka konkrete - shumica dërrmuese e këtyre zjarreve nuk filluan në pyll të thellë, por në vende ku dikush hodhi, ndezi ose la diçka.

Apeli është falas, pastrimi jo

Apeli i QUK-së dihet përmendsh: të mos ndizet zjarr në hapësirë të hapur, të mos hidhen bishta cigaresh dhe mbeturina të ndezshme në natyrë, çdo tymim të lajmërohet menjëherë në 112. Asnjë fjalë prej tij nuk është e kontestueshme.

Por kur 1.627 nga 1.696 zjarre janë në bar, kashtë dhe deponi, pyetja nuk është a i dëgjuan qytetarët apelet. Pyetja është kush i mirëmban ato deponi, kush i kontrollon djegiet e kashtës dhe sa procedura kundërvajtëse janë ngritur për tre muaj. Apeli është masa më e lirë që një institucion mund ta zbatojë dhe më e lehta për ta përsëritur vitin e ardhshëm.

Shtatori nuk sjell lehtësim

Drejtori i Drejtorisë për mbrojtje dhe shpëtim, Stojançe Angellov, paralajmëroi se rreziku mbetet jashtëzakonisht i lartë. Vetëm në një ditë u regjistruan 26 zjarre. Një zjarr i rëndë është aktiv në Komunën e Strugës, te fshatrat Llokov dhe Burinec, ku digjen pyll me trungje të ulëta, shkurre dhe ferra, me rrezik që zjarri të kapë pyll cilësor. Temperaturat e larta ditore e kufizojnë përdorimin e helikopterit.

Në një raport të mëngjesit, deri në orën 7:30, ishin evidentuar 41 zjarre - 30 të shuara, pesë të vëna nën kontroll, gjashtë aktive. U dogj te Shtipi mes fshatrave Sellce, Puhçe, Stepanci dhe Llakavica. U dogj në rrethin e Strugës te Piskupshtina, Llukovo dhe Burinec. U dogj në Kërçovë te Tajmishta. Në Rrafshin e Shkupit u shua në tri lokacione - Kopanica në Saraj, Paligrad në Studeniçan dhe Graçani në Gjorçe Petrov.

Ekipet në terren e kryejnë punën e tyre. Efekti i tyre duket në shifrën prej 30 zjarresh të shuar për 24 orë. Ajo që nuk duket është sistemi që duhet ta ulë numrin e zjarreve që fillojnë fare.

Tre muaj, gati 1.700 zjarre, dhe një sezon që çdo vit fillon me apele e mbaron me statistikë.