Real Madridi mori një „jo" zyrtare nga ana tjetër e qytetit. Atletiko Madridi e refuzoi ofertën prej 150 milionë euro për Hulian Alvarezin dhe porositi shkurt: sulmuesi argjentinas ka një klauzolë largimi prej 500 milionësh - ose e paguani, ose s'kemi për çfarë të flasim. Të njëjtin mesazh e mori më parë edhe Barcelona, oferta fillestare e së cilës prej 100 milionësh përfundoi në të njëjtin sirtar.

Problemi i Realit nuk është vetëm te çmimi - problemi është te premtimi. Gjatë fushatës zgjedhore në klub, Florentino Perez premtoi një „Galaktikos si Kristiano Ronaldo dhe Kaka" për 150 milionë euro. Tingëllon shkëlqyeshëm në tribunë para anëtarësisë. Por tregu i vitit 2026 nuk është tregu i vitit 2009 - me 150 milionë sot nuk blihet ëndërr, blihet refuzim.

Ëndrrat rezervë nuk duken më afër. Michael Olise është dëshirë, por Bajern Mynihu thotë se krahu nuk shitet. Vitinha vështirë lëviz nga Parisi. Për Alvarezin janë të interesuar edhe Arsenali edhe PSZH-ja, por asnjëri prej tyre nuk ka shkuar më tej se interesimi. Mbetet Enzo Fernandez - Çelsi është i hapur për shitje dhe lojtari është në radarin e Madridit, vetëm se emri i tij nuk i mbush faqet e para si Olise, Alvarez apo Vitinha. Dhe një Galaktikos që nuk mbush tituj nuk është Galaktikos.

Ndërkohë, Reali nuk rri duarkryq. Ibraima Konate dhe Denzel Damfris janë dakorduar tashmë si agjentë të lirë, për krahun e majtë në listë janë Rikardo Kalafiori nga Arsenali dhe Joshko Gvardiol nga Mançester Siti, ndërsa pritet edhe një vendim për aktivizimin e klauzolës së largimit prej 9 milionësh për Niko Paz. Një program solid tregu - vetëm pa kurorën.

Dhe këtu është tërë ironia e verës në Madrid: një president që premtoi spektakël, dhe klube që nuk shesin më spektakël për ato para. Kush do të lëshojë i pari - Perez me çekun, apo premtimi i fushatës?