Druri është ende zgjedhja e parë për ngrohje: katër nga dhjetë familje nuk heqin dorë

Përkundër të gjitha subvencioneve, inverterëve dhe tregimeve për tranzicionin energjetik, sezoni i ngrohjes në Maqedoni ende fillon në të njëjtin vend - te grumbulli i druve në oborr. Pothuajse katër nga dhjetë familje, përkatësisht rreth 40 për qind, ende ngrohen me dru, çka e mban këtë lëndë djegëse fort në vendin e parë.

Megjithatë, diçka po ndryshon ngadalë. Popullariteti i klimave inverter po rritet, sidomos te familjet në qytete dhe te ata që kërkojnë një zgjidhje më të shpejtë e më të pastër. Zgjedhja në fund gjithmonë zbret te e njëjta llogari - investimi fillestar përballë shpenzimit mujor, dhe kush sa mund të përballojë që në fillim.

Pas shifrës prej 40 për qind qëndron një histori më e madhe se si jeton një familje e zakonshme. Druri mbetet zgjedhja e parë jo sepse është më moderni, por sepse për shumëkënd është e vetmja gjë që dinë dhe mund ta paguajnë. Ndërsa politikanët flasin për tranzicion të gjelbër dhe standarde evropiane, realiteti në oborr është tjetër. Tranzicioni nuk është vetëm teknologji - ai është edhe pyetja se kush mund ta përballojë, dhe kush do të mbetet te vatra e vjetër.