Filkov: provimi i jurisprudencës mund të jepet vetëm në maqedonisht, ndërsa për „zgjidhjen hibride“ të pasardhësit të tij mësoi nga mediat

Ish-ministri i Drejtësisë dhe kryesuesi i Këshillit Qendror të ZNAM-it, Igor Filkov, deklaroi se Kushtetuta dhe ligjet nuk lejojnë që provimi i jurisprudencës të jepet në gjuhë tjetër përveç maqedonishtes. „Për momentin nuk ka mundësi për dhënie në gjuhë tjetër sipas Kushtetutës dhe ligjeve. Le të presim që të gjendet zgjidhje, ta shohim, pastaj do të flasim“, tha Filkov.

Zgjidhjen që e ofron pasardhësi i tij në Ministrinë e Drejtësisë, Jeton Shasivari nga Vlen, Filkov e quajti „hibride“ - dhe shtoi se për të mësoi nga mediat. Kjo fjali thotë më shumë se vetë mosmarrëveshja: ish-ministri dhe pasardhësi i tij ulen në të njëjtin pushtet, ndërsa për një çështje kyçe nga i njëjti resor dëgjohen përmes gazetave.

„Unë nuk jam kundër që dikush të japë provim në gjuhën që është e mundësuar sipas ligjeve dhe Kushtetutës. Ajo që më shqetëson mua është se kjo zgjidhje hibride u refuzua ad acta nga ata që protestojnë dhe kundërshtojnë të japin provim në gjuhën që nesër duhet ta përdorin në të gjitha ato institucione ku planifikojnë të punojnë si gjyqtarë, avokatë, prokurorë“, deklaroi Filkov.

Tema u shndërrua në problem koalicioni pasi lideri i ZNAM-it dhe kryetari i Kumanovës, Maksim Dimitrievski, të premten në një intervistë televizive tha se partia e tij do ta lërë Qeverinë nëse pranohet që provimi të jepet në gjuhë tjetër përveç maqedonishtes. Ai shtoi se qëndrimi i ZNAM-it i është i njohur kryeministrit Hristijan Mickoski dhe se do të kërkojë një takim liderësh për të përcaktuar vijat e kuqe me partnerët e koalicionit.

Një partner koalicioni e ofron zgjidhjen, një tjetër kërcënon se do të largohet nëse ajo kalon. Provimi që duhet t'i verifikojë gjyqtarët dhe prokurorët e ardhshëm u bë test për vetë qeverinë. Cilën zgjidhje e mbështet kryeministri?