Vërtetim në letër nga fakulteti, radhë në biletari, vulë për vërtetim - për studentët në Shkup ky ritual po shkon në histori. Ndërmarrja e transportit publik JSP Shkup, me mbështetjen e Qytetit të Shkupit dhe në bashkëpunim me Universitetin „Shën Cirili dhe Metodi“, po fut kartën digjitale studentore të transportit për transportin publik falas.

Karta do të vlejë për studentët e universiteteve shtetërore në Shkup, përfshirë edhe Universitetin „Nënë Tereza“. Të dhënat për statusin studentor do të sinkronizohen automatikisht mes JSP-së dhe universiteteve, kështu që nuk do të duhen as vërtetime, as vizitë në biletari.

Studentët do të marrin udhëzime me e-mail dhe kartën do ta aktivizojnë përmes aplikacionit SkopjeBus, me të njëjtën adresë elektronike me të cilën janë regjistruar në fakultet. Në aplikacion karta do të ketë kod QR, që do të përdoret për validim gjatë udhëtimit. Për mënyrën e saktë të aktivizimit, nga JSP thonë se studentët do të njoftohen me kohë.

Më në fund një institucion e ka kuptuar se e dhëna mund të udhëtojë në vend të njeriut. Nëse dy institucione mund të shkëmbejnë të dhëna pa vulë e sportel, pse pjesa tjetër e administratës ende kërkon që ta bartim letrën nga një ndërtesë në tjetrën?