Хартиена потврда од факултет, редица на билетарница, печат за заверка – за студентите во Скопје тој ритуал заминува во историја. ЈСП Скопје, со поддршка од Град Скопје и во соработка со Универзитетот „Св. Кирил и Методиј“, воведува дигитална студентска превозна картичка за бесплатниот јавен превоз.

Картичката ќе важи за студентите на државните универзитети во Скопје, вклучително и Универзитетот „Мајка Тереза“. Податоците за студентскиот статус ќе се синхронизираат автоматски меѓу ЈСП и универзитетите, па нема да треба ниту потврди ниту посета на билетарница.

Студентите ќе добијат упатства на е-пошта и картичката ќе ја активираат преку апликацијата SkopjeBus, со истата е-адреса со која се регистрирале на факултетот. Во апликацијата картичката ќе има QR-код, кој ќе се користи за валидација при патување. За точниот начин на активирање, од ЈСП велат дека студентите ќе бидат навремено известени.

Конечно една институција сфатила дека податокот може да патува наместо човекот. Ако две институции можат да си разменуваат податоци без печат и шалтер, зошто остатокот од администрацијата сè уште бара да носиме хартија од една зграда до друга?