Një i panjohur arriti te mbreti holandez Willem-Alexander në Ursem: sigurimi reagoi, ndërsa mbreti u ndal ta dëgjonte

Mbreti Willem-Alexander të premten e vizitoi Ursemin, një vend të vogël në veri të Holandës. Qindra njerëz prisnin ta përshëndesnin, ndërsa rreth tij kishte sigurim dhe polici. Dhe pikërisht përmes atij kordoni, një burrë u nis drejt e te mbreti.

Gazetari i televizionit lokal NH Nieuws, Tom Jurriaans, i cili ishte në vendngjarje, e përshkroi burrin si „ndoshta pak të çorientuar“. Agjentët e ndaluan në kohë. Por para se policia ta nxirrte, mbreti bisedoi shkurt me të. Burri tha se kishte ardhur nga Hoogwoud dhe se i duhej ndihmë, sepse, sipas tij, rrezatimi i radarëve e dëmton.

Mbreti në fillim u habit dukshëm, por shpejt u përmblodh dhe u përpoq ta qetësonte situatën. E frikësuar ishte edhe turma. Policia pastaj i kërkoi burrit të shkonte me të dhe e largoi nga vendi. Nëse do të ketë pasoja ligjore, nuk dihet. Shtypi lokal shkruan se burri ka çrregullime mendore.

Pjesa tjetër e vizitës kaloi pa probleme, me një pritje të ngrohtë nga banorët. Por pyetja mbetet: nëse një njeri që kërkon mbrojtje nga radarët mund të arrijë te mbreti përmes qindra njerëzve dhe një muri policor, sa i fortë është vërtet ai mur?

Nga ana tjetër, mbreti nuk u fsheh pas truprojave. U ndal dhe e dëgjoi burrin, e vetëm pastaj ia la policisë. Sa funksionarë në Ballkan do të ndaleshin para një qytetari që u afrohet pa paralajmërim?