Parlamenti hungarez në seancë të jashtëzakonshme, me kërkesë të prokurorisë, ia hoqi imunitetin kryeministrit Péter Magyar. Në të njëjtën paketë mbetën pa mbrojtje edhe dy ish-ministra - Balázs Hankó, dikur ministër i Kulturës dhe Inovacionit nga radhët e Fideszit, dhe Miklós Szeszták, ish-ministër i Zhvillimit. Të tre janë deputetë në përbërjen aktuale të parlamentit.

Telefoni që përfundoi në Danub

Rasti kundër Magyarit është gati filmik. Në qershor të vitit 2024, në një klub nate në Budapest, ai hyri në grindje me një burrë që po e filmonte me telefon celular. Sipas prokurorisë, Magyar ia mori telefonin dhe e hodhi në Danub. Pajisja më vonë u gjet me ndihmën e zhytësve. Në atë kohë Magyar ishte deputet në Parlamentin Evropian, i cili nuk e miratoi heqjen e imunitetit të tij, prandaj procedura u ndal. Mandati në Parlamentin Evropian i skadoi më 8 maj 2026 - e bashkë me të edhe mbrojtja. Prokuroria tani rastin e trajton si dyshim për vjedhje.

Detaji më interesant është se Magyar vetë kërkoi publikisht që parlamenti t'ia heqë imunitetin. Njëkohësisht e kritikoi prokurorinë që rastin e tij e shqyrton bashkë me lëndët e Hankós dhe Szesztákut, duke pohuar se bëhet fjalë për gjëra krejtësisht të ndryshme. Paralajmëroi edhe iniciativë për heqjen e imunitetit të deputetëve për vepra penale që ndiqen sipas detyrës zyrtare.

Telefon përballë miliardave

Dallimi mes tre lëndëve të vret sytë. Hankó është nën hetim për shkak të Fondit Kombëtar për Kulturë (NKA), mjetet e të cilit, sipas prokurorisë, janë përdorur në mënyrë që mund t'i shkaktonte dëm të konsiderueshëm buxhetit të shtetit - bëhet fjalë për rreth 17,3 miliardë forinta dëm potencial. Ai i hedh poshtë akuzat dhe paralajmëron se do t'i kundërshtojë në detaje. Szeszták përfshihet në një hetim të veçantë për prokurimet e transportuesit të autobusëve „Volánbusz“ nga viti 2015 deri në 2018, ku prokuroria dyshon për marrje ryshfeti, ndërsa mediat hungareze shkruajnë për shuma shumëmilionëshe.

Me një vendim, pra, parlamenti e hapi rrugën për hetim kundër një kryeministri të dyshuar për një telefon të hedhur dhe kundër dy ish-ministrave të dyshuar për dëm miliardësh dhe ryshfet. Imuniteti i hequr nuk do të thotë fajësi për asnjërin prej tyre. Ai vetëm e largon pengesën ligjore që prokuroria t'i hetojë drejtpërdrejt si të dyshuar, nëse për këtë ekzistojnë kushte ligjore dhe prova të mjaftueshme.

Magyar e mori qeverinë para pesë muajsh, pas epokës së Viktor Orbánit, me premtimin se do ta pastrojë shtetin. Tani testi i parë serioz i këtij premtimi është ai vetë - dhe për momentin zgjedh të mos fshihet pas funksionit. Sa kryeministra në Ballkan do të kërkonin të njëjtën gjë për veten?