Pas nëntë vitesh në të cilët u bë një nga mbrojtësit anësorë më të dekoruar në historinë moderne të Liverpulit, Endi Robertson largohet - dhe pa dëmshpërblim. Kapiteni i Skocisë do t'i bashkohet Totenhemit më 1 korrik si lojtar i lirë, konfirmoi klubi londinez.

Shifrat pas tij flasin vetë: 378 paraqitje, 14 gola dhe 69 asistime me fanellën e Liverpulit. Me të, në Anfild erdhën dy tituj në Premier Ligë, Liga e Kampionëve, FA Kapi dhe dy Liga Kapa. Bashkë me Trent Aleksandër-Arnoldin, Robertson e ridefinoi atë që do të thotë një mbrojtës anësor modern sulmues - të dy ishin motori i viteve më të mira të ekipit nën Jirgen Klop.

Por futbolli nuk paguan për meritat e djeshme. Sezonin e kaluar Robertson sërish mblodhi 36 paraqitje në të gjitha garat, mirëpo nisi vetëm 11 herë në kampionat - Liverpuli gjithnjë e më shpesh shikonte drejt një opsioni më të ri në krahun e majtë. Kur kontrata i skadoi këtë verë, askush në Anfild nuk luftoi për ta mbajtur.

Totenhemi tashmë ishte përpjekur ta sillte në afatin dimëror të transferimeve, por Liverpuli atëherë nuk donte ta lëshonte në një largim në mes të sezonit. Sapo u bë e qartë se do të ishte i disponueshëm pa dëmshpërblim, londinezët e rindezën ofertën - dhe këtë herë e mbyllën punën lehtë.

Për Totenhemin, që mbijetesën në Premier Ligë e siguroi vetëm në javën e fundit të sezonit të kaluar, kjo është edhe një mesazh për ambiciet nën De Zerbi. Pyetja është nëse mbrojtësi 31-vjeçar vjen për ta mbartur projektin e tyre të ri apo për ta mbyllur rrethin e karrierës larg dritave të Anfildit. Përvojën që sjell askush nuk ia merr - por nëse këmbët do ta ndjekin, do ta tregojë vjeshta e parë.