84 të vdekur në rrugë për dhjetë muaj, 33 më pak se vjet: shoferët i mësuan kamerat, tani vijnë automjetet e policisë

Shoferët në Maqedoni mësuan një gjë më shpejt se çdo ligj: ku qëndrojnë kamerat e Sejf Sitit. Para tyre ngasin ngadalë, pas tyre - si të duan. Këtë nuk e pohojnë kritikët, por ministri i Punëve të Brendshme Pançe Toshkovski: „Ata që i drejtojnë automjetet në mënyrë të papërgjegjshme, ngadalë-ngadalë i mësuan vendndodhjet e kamerave“.

Përgjigjja e MPB-së: nga viti i ardhshëm një numër i madh automjetesh policore do të mund të zbulojnë një veturë që ecën më shpejt se e lejuara, ndërsa kundërvajtja do të shënohet drejtpërdrejt në sistemin elektronik. „Tani nuk do të mund të supozojnë ku do të jenë automjetet e policisë“, thotë Toshkovski.

Ministri ka edhe shifra me të cilat mburret. Në dhjetë muajt e parë të këtij viti në rrugë humbën jetën 84 persona, kundrejt 117 në dhjetë muajt e parë të vitit të kaluar - 33 më pak, ose rënie prej rreth 28 për qind. Në 35 vitet e fundit, sipas tij, në rrugët e Maqedonisë në mesatare vdisnin rreth 150 njerëz në vit.

Strategjia e re Kombëtare për Sigurinë në Trafikun Rrugor 2026-2030, dokument prej 145 faqesh, parashikon që deri në vitin 2030 numri i të vdekurve të përgjysmohet në krahasim me vitin 2024. Shkalla e vdekshmërisë tek ne është më e lartë se mesatarja evropiane, e cila është 44 të vdekur për një milion banorë. MPB, nga ana tjetër, është mes pesë institucioneve të përzgjedhura për çmim në Samitin Botëror të Policisë në Dubai.

Në promovimin e strategjisë, profesori Nikolla Dujovski porositi se duhet të ndërtohen rrugë që do t'i mbrojnë qytetarët, që njerëzit të mos vuajnë për shkak të lëshimeve në ndërtim dhe dokumentacionit të papërshtatshëm.

Rënia është reale dhe çdo jetë e shpëtuar vlen. Por kur edhe vetë ministri pranon se shoferët ngasin më ngadalë vetëm aty ku e dinë se incizohet, pyetja është nëse zakonet vërtet kanë ndryshuar apo shoferët vetëm kanë mësuar një hartë. Dhe sa nga ato 145 faqe do të kenë të bëjnë me rrugët, e jo vetëm me gjobat?