Pas rastit me ujin në Gostivar, mes banorëve të Shkupit filloi të përhapet një panik i heshtur - dhe karroca të mbushura me ujë të shishezuar në markete. Nga Ujësjellësi i Shkupit porosia është e qartë: uji në kryeqytet është i sigurt për të pirë.

Pas incidentit të kohëve të fundit me ujin e pijshëm në Gostivar, edhe në kryeqytet filluan të qarkullojnë thashetheme të pabaza për një gjoja mosfunksionim të rrjetit ujësjellës edhe në Shkup. Të nxitur nga frika dhe nga informacione që përhapen shpejt „nga një njeri i besuar”, gjithnjë e më shumë qytetarë këto ditë blejnë ujë të shishezuar.

Nga NP „Ujësjellësi dhe kanalizimi” - Shkup i hedhin poshtë kategorikisht spekulimet. „Laboratorët e akredituar, në përputhje me standardin ISO 17025, çdo ditë marrin mostra nga 36 vendmatje të rregullta në qytetin e Shkupit”, theksojnë nga ndërmarrja. Në këtë periudhë të vitit, në monitorim është përfshirë edhe pjesa e puseve Nerezi-Lepenec. Të gjitha mostrat e testuara, thonë, i plotësojnë kriteret e Rregullores për sigurinë dhe cilësinë e ujit të pijshëm.

Ndërmarrja kujton se Shkupi furnizohet me ujë nga një prej burimeve natyrore më cilësore në rajon, i cili është nën mbikëqyrje të vazhdueshme laboratorike dhe profesionale. Opinioni, shtojnë, informohet rregullisht dhe në mënyrë transparente për sigurinë e ujit përmes raporteve javore.

Dhe këtu arrijmë te ajo që Gostivari vërtet e ndryshoi - besimi. Kur një herë shfaqet dyshimi se uji nga çezma nuk është i sigurt, asnjë raport nuk lexohet njësoj. Apeli i Ujësjellësit që të mos i nënshtrohemi burimeve të paverifikuara është i saktë - por paniku nuk lind nga hiçi. Ai lind kur qytetarët nuk janë më të sigurt se institucionet do t'i njoftojnë me kohë nëse diçka shkon keq. Uji i Shkupit është i sigurt. Pyetja që Gostivari la të hapur është nëse gjithmonë do të njoftohemi me kohë kur nuk është.