Vardarishta u shua, pason dekontaminim prej 2,5 milionë eurosh: rreth 200 njerëz ende jetojnë në deponi

Shuarja e deponisë joformale Vardarishta përfundoi. Pason dekontaminimi i tokës, e pastaj, nëse u besohet paralajmërimeve, park. Këtë e njoftoi iniciativa e pavarur qytetare „Stop për Vardarishtën“, pas takimit me përfaqësues të Qytetit të Shkupit.

Lajmi i mirë është se përqendrimet e matura të metanit, sipas iniciativës, nuk janë aq të larta sa ta pengojnë procesin. I keqi është se deponia ende nuk është stabilizuar plotësisht. Përfundimi kryesor në raportin e grupacionit që e shuajti lokacionin është se prania e metanit dhe dioksidit të karbonit tregon se dekompozimi i materies organike vazhdon ende.

Dekontaminimin nuk do ta udhëheqë Qyteti, por Qeveria. Për të janë miratuar 2,5 milionë euro, nga gjithsej 10 milionë euro, prej të cilave 7,5 milionë shkojnë për përfundimin e sistemit të kolektorëve. Si kontraktor është paralajmëruar kompania gjermane WTE, që punon edhe në stacionin e pastrimit, ndërsa mbikëqyrjen duhet ta bëjë një kompani franceze. Ndërhyrja duhet të përfshijë rreth 600.000 metra katrorë: gërmimin dhe largimin e mbeturinave, transportin deri në Drisllë dhe mbrojtjen e ujërave nëntokësore. Punimet duhet të nisin nga mesi i nëntorit dhe të përfundojnë deri në mars 2027.

Projektin për parkun e ardhshëm e harton NP „Rrugë dhe Udhë“ dhe duhet të jetë gati në fillim të vitit të ardhshëm, me prezantim publik dhe mundësi që qytetarët të japin propozime. Vetë ndërtimi, sipas vlerësimeve fillestare, do të zgjaste shtatë deri në tetë muaj.

Dhe këtu vjen pjesa që askush nuk e vendos në fillim të njoftimeve. Në Vardarishtë, në vendbanime joformale, ende jetojnë rreth 200 njerëz. Shpërngulja e tyre ishte planifikuar para disa muajsh, pastaj u shty derisa të krijoheshin kushte. Tani vijnë ekskavatorët, gërmimi dhe transporti i mbeturinave që digjeshin dhe dekompozoheshin poshtë tyre.

U është premtuar se do t'u sigurohet trajtim i përshtatshëm dhe zgjidhje për strehim. Datë nuk ka. Nëse dekontaminimi nis në nëntor, ndërsa shpërngulja nuk ka afat, kush do t'u shpjegojë atyre 200 njerëzve se çfarë thithin ndërsa ekskavatorët gërmojnë mbeturinat?