Dronët ukrainas djegin rafineritë ruse: mbi 20 rajone në Rusi tashmë po racionojnë karburantin

Ukraina po e bart luftën thellë në territorin rus, dhe pikërisht atje ku dhemb më shumë - në industrinë e naftës. Dronët ukrainas gjatë natës goditën disa rafineri ruse, ndërsa rrjetet sociale po mbushen me pamje flakësh të larta dhe tymi të dendur mbi rezervuarët.

Mes të goditurave është rafineria në Sllavjansk në krahinën e Krasnodarit, një pikë kyçe për furnizimin me karburant të Krimesë së pushtuar. Nën sulm ra edhe rafineria në Jaroslavl, rreth 250 kilometra në verilindje të Moskës, çka e konfirmoi edhe guvernatori lokal. Autoritetet ruse, si zakonisht, dëmin ia veshin „mbeturinave të rëna" - një formulim që përsëritet aq shpesh sa nuk bind më askënd.

Goditjet vijnë mes një krize gjithnjë e më të madhe me karburantin në vetë Rusinë. Mbi 20 rajone tashmë kanë vendosur kufizime të shitjes, ndërsa qytetarët raportojnë radhë shumëorëshe para pompave. Nuk është goditje e izoluar, por pjesë e një fushate sistematike: më 19 qershor u mbyll rafineria e Moskës që mbulon 40 për qind të atij tregu, më 25 qershor u goditën dy rafineri në Bashkortostan, ndërsa nga fundi i muajit u ndal edhe një nga katër më të mëdhatë në vend.

Kievi zyrtarisht hesht për sulmet, si zakonisht. Por mesazhi është i qartë: lufta prej kohësh nuk është vetëm në front - ajo është edhe në radhën para pompës së benzinës, në çmimin e karburantit, në përditshmërinë e njeriut të zakonshëm larg vijës së zjarrit. Kjo është një mësim që Ballkani e mësoi prej kohësh - lufta i mundon më shumë pikërisht ata që kurrë nuk e deshën.