Телевизијата Еј-Би-Си ќе продолжи да го пренесува доделувањето на Оскарите до 2028 година, кога ќе се одржи јубилејното 100-то издание на најпрестижната филмска награда. Потоа, од 2029 до 2033 година, Јутјуб ќе ги поседува ексклузивните права за пренос во живо, со што Оскарите првпат целосно се селат од класичната телевизија на дигитална платформа.

Со новиот договор, Јутјуб станува главна глобална платформа за сите содржини поврзани со Оскарите – вклучувајќи го преносот од црвениот тепих, доделувањето на Гувернерските награди, како и објавувањето на номинациите. Свечената церемонија ќе биде бесплатно достапна за публика ширум светот, со повеќејазичен аудиопренос и титлување.

„Со ова партнерство Академијата го проширува своето светско достигнување и ја приближува церемонијата до нова публика“, изјавија извршниот директор на Академијата, Бил Крамер, и претседателката Линет Хауел Тејлор.

Иако големите светски настани сè почесто се префрлаат на стриминг-платформи, Оскарите стануваат први од т.н. ‘голема четворка’ што целосно се откажуваат од традиционалното телевизиско емитување. Така, еден од најгледаните културни настани во светот преминува под капата на „Гугл“, преку Јутјуб – платформа со околу две милијарди корисници.

„Ова е културно партнерство што ја слави уметноста и има за цел да инспирира нова генерација филмски автори и публика“, изјави извршниот директор на Јутјуб, Нил Мохан.

Од Еј-Би-Си засега не коментираат за одлуката на Американската академија за филмски уметности и науки. Телевизијата го емитуваше доделувањето на Оскарите речиси без прекин од 1961 година, со исклучок на периодот од 1971 до 1975 година, кога преносот беше на Ен-Би-Си.