Цената на Брент суровата нафта се зголеми за над 25 отсто за само неколку дена и ја надмина границата од 90 долари за барел, откако воените дејствија на Блискиот Исток предизвикаа речиси целосно блокирање на Хормускиот теснец. Во само една недела цената порасна за над 8 отсто, достигнувајќи 92,69 долари за барел — највисоко ниво од 2023 година наваму.

Аналитичарот Боб Мекнели од Рапидан Енерџи Груп предупредува дека „се очекува Брент да достигне 100 долари за барел или повеќе во наредните денови или недели”. Нафтените пазари реагираат на скоро целосното прекинување на поморскиот сообраќај низ Хормускиот теснец — теснец низ кој поминуваат околу 20 милиони барели нафта дневно, или речиси една петтина од глобалната потрошувачка.

Во Персискиот Залив во моментов се видливи само девет празни супертанкери, а алтернативните рути на кои Саудиска Арабија и Обединетите Арапски Емирати ги пренасочуваат своите извози можат да покријат само околу една третина од нормалниот волумен.

Катарскиот министер за енергетика Саад ал-Кааби предупреди дека ако конфликтот продолжи, цените би можеле да достигнат и до 150 долари за барел. Катар веќе прогласи „виша сила” за одредени испораки на течен природен гас. Аналитичарите на Голдман Сакс исто така предупредуваат дека цената ќе ја надмине границата од 100 долари доколку кризата не се разреши.

Последиците не се ограничени само на нафтата. Дизелот поскапи за преку 50 отсто за само неделава, авионскиот керозин во некои региони ја надмина цената од 200 долари за барел, а европскиот природен гас порасна за приближно 67 отсто. Експертите предупредуваат дека продолжувањето на енергетскиот шок ќе доведе до раст на инфлацијата, повисоки цени на храната и транспортот и намалена индустриска производња насекаде во светот.