Конфликтот на Блискиот исток ги поттурна цените на суровата нафта Brent над 107 долари по барел, највисоко ниво од март 2024 година. Пред избувнувањето на конфликтот, цените беа на нивото од 72 долари по барел.

Хормускиот теснец, преку кој поминуваат околу 20 отсто од глобалната потрошувачка на нафта, практично е блокиран за комерцијален сообраќај. Иран поседува приближно 10 отсто од светските нафтени резерви и ги контролира зоните низ кои поминуваат критичните бродски рути.

Членките на ОПЕК+ постигнаа договор на 28 февруари за зголемување на дневното производство за 206.000 барели почнувајќи од април, но овој чекор не успеа да ги смири пазарите соочени со поголемо нарушување на снабдувањето.

Европа, која е главно увозник на нафта и гас, се соочува со директни последици – повисоките цени на енергентите ги зголемуваат трошоците на домаќинствата и индустријата. Економистите предупредуваат дека продолженото блокирање на Хормуз може да предизвика рецесиски притисоци на европскиот континент.