Директорот на Шеврон испрати остро предупредување до светот – пазарот уште не ги осетил вистинските последици од затворањето на Хормушкиот Теснец. Меѓународната агенција за енергетика (ИЕА) предупредува на најтешка глобална енергетска криза во историјата.

Извршниот директор на ИЕА Фатих Бирол изјави дека приближно 11 милиони барели нафта дневно се изгубени – повеќе од нафтените шокови во 1973 и 1979 година, како и од колапсот на пазарот на гас во 2022 по руската инвазија на Украина.

Бирол нагласи дека околу 40 критични енергетски инфраструктурни објекти во девет блискоисточни земји претрпеле сериозни оштетувања, дополнително нарушувајќи ја глобалната достапност на нафта и гас. „Ниеден економски систем нема да биде имун доколку прекините продолжат”, предупреди тој.

ИЕА го координирала најголемото досегашно ослободување на нафтени резерви – приближно 400 милиони барели од стратешките резерви на земјите-членки. Сепак, агенцијата нагласува дека обновувањето на непречената пловидба низ Хормушкиот Теснец е суштинско за трајна економска стабилност.