Arseneli fitoi me 1:0 te Vest Hemi në Londër dhe në fakt zgjidhi atë që prej kohësh dukej e sigurt: titullin në Premier ligë. Me pesë pikë diferencë dhe dy javë deri në fund, ekipi i Mikel Artetës është praktikisht një hap larg trofeut të parë të kampionatit që nga sezoni 2003/2004.

Ndeshja në London Stadium nuk ishte shfaqje. Për një kohë të gjatë dukej se Vest Hemi do të bënte habinë më të madhe të pranverës - në minutën e 78-të Mateus Fernandes doli i vetëm para portës, por Dejvid Raja shpëtoi nga distancë e afërt. Një pritje që fiton një titull.

Vetëm minuta më vonë, në anën tjetër, Leandro Trosar shpoi rrjetën për golin e vetëm të ndeshjes. Skuadra vendase në vetë finishin mendoi se shpëtoi një pikë përmes Kalum Vilsonit, por goli u anulua për faull në zhvillimin e aksionit. VAR-i sërish fjala vendimtare.

Me këtë humbje, Vest Hemi mbetet i 17-ti dhe nuk arriti të dalë nga zona e rënies. Nëse Totenhemi e fiton Lidsin të hënën, „çekanët" do të jenë në minus katër nga shpëtimi - dhe para tyre mbeten gostiljia te Njukasli dhe pritja e Lidsit. Me fjalë të tjera - dy finale, pa të drejtë gabimi.

I njëjti rezultat kishte edhe efekt anësor: Lidsi dhe Notingem Foresti matematikisht siguruan Premier ligën për sezonin e ardhshëm. Shtatë pikë diferencë, dy javë deri në fund, detyrat e shtëpisë të kryera.

Po Arseneli? Fitore në Bërnli dhe te Krystal Palas dhe unaza e parë e kampionit pas dy dekadash bëhet realitet. Mançester Siti, që e mundi Brentfordin me 3:0 të shtunën, mbetet pesë pikë mbrapa, por pa mrekulli në dy javët e fundit - dhe pa rënie të Artetës - ky sezon për „topat" ka mbaruar para se të mbarojë.