PSZH-ja është sërish kampione e Evropës - por u deshën të gjitha 120 minutat dhe një dramë penalltish për të mbrojtur titullin në Ligën e Kampionëve. Arsenali kaloi në epërsi herët dhe për një kohë të gjatë dukej si ekipi që do ta merrte kurorën, por në fund sërish iku duarbosh.

Ndeshja ishte një dramë klasike finaleje. Arsenali, me një gol të hershëm, e mori iniciativën dhe i detyroi parizianët të vraponin pas. Por PSZH-ja, me cilësinë dhe përvojën që e ndërtuan ndër vite (dhe me investime të mëdha), arriti të kthehej në ndeshje dhe ta çonte deri te penalltitë - ajo llotaria më mizore në futboll.

Për Arsenalin, ky është edhe një kapitull i hidhur në kërkimin e titullit të parë në Ligën e Kampionëve. „Topçinjtë" prej vitesh janë afër, por gjithmonë diçka mungon - përvoja, pak fat, ose vetëm një moment që shkon në anën e kundërt. Një finale e humbur me penallti pas një epërsie të hershme është pikërisht ai lloj momenti që dhemb gjatë.

PSZH-ja, nga ana e vet, e vërtetoi pozitën si një fuqi e re në futbollin evropian. Mbrojtja e një titulli në Ligën e Kampionëve nuk është gjë e lehtë - këtë e arrijnë vetëm më të mirët. Dhe mënyra si e bënë, duke u kthyer nga prapambetja dhe duke e duruar presionin deri te penalltitë, thotë se ky ekip ka edhe cilësi edhe karakter. Kurora mbetet në Paris.