Rroba të përdorura nga një treg në Lagos dhe një video virale: nigeriania 22-vjeçare Rejçel Oxhuromi eci për Chanel në Paris

Rejçel Oxhuromi është 22 vjeçe dhe vjen nga Lagosi. Stilin e saj e ndërtoi me rroba të dorës së dytë, një pjesë të blera në tregun Jaba, dhe e tregonte në Instagram, ku me emrin @giverachelashot e ndjekin qindra mijëra njerëz. Në sfilatën e Chanel për pranverë-verë 2027, në Grand Palais në Paris, ajo eci në pistë si mysafire nderi.

Kthesa ishte një video. Bashkë me stilisten Debi Fasinga dhe fotografin Odej Ikpa, ajo xhiroi një homazh për koleksionin Métiers d'Art të Chanel - të përbërë tërësisht nga copa të vjetra, të përdorura. Videoja u bë virale dhe arriti te Matje Blazi, drejtori kreativ i shtëpisë. Ai e kontaktoi personalisht. Pasuan kontrata me agjenci ndërkombëtare dhe shpërngulja në Francë.

Në pistë veshi një kombinim prej tvidi në ngjyrë të verdhë dhe gri, me përmasa të ripunuara nga Blazi. Për Harper's Bazaar tregoi se qau pasi mori konfirmimin dhe pas provës. Blazi, nga ana e tij, e prezantoi para ekipit të prodhimit të Chanel si mendjen kreative pas videos që të gjithë e kishin parë tashmë.

Historia është e bukur - dhe për Chanel e leverdishme. Një shtëpi luksi, xhaketat e tvidit të së cilës kushtojnë mijëra euro, fiton një fytyrë që provoi se ai stil mund të montohet nga një tezgë tregu - dhe në vend që të mbrohet, e fton në pistë. A është ky njohje e talentit apo marketingu më i zgjuar që shtëpia ka blerë këtë vit? Me shumë gjasa të dyja.

Oxhuromi duket se këtë e di më mirë se kushdo. Përmes platformës së saj The Process Africa, ajo ndihmon talente të reja afrikane në modë dhe arte vizuale - ata që ende xhirojnë mes tezgave dhe presin që dikush në Paris t'i vërejë. Sa të rinj të tillë ka edhe në qytetet tona, me telefon, rroba të përdorura dhe një sy që askush nuk e ka paguar?