Kuzhinieri Dani Karnero ka yll Michelin, ndërsa në restorantin e tij do të shërbejë ushqim shtëpie për rreth 40 euro: më mirë ta kuptojë kuzhinën e vjetër se të shpikë një të re

Dani Karnero është kuzhinier nga Malaga me yll Michelin. Drejton restorantin Kaleja, si dhe La Cosmo, vazhdimin e La Cosmopolita-s së mbyllur. Ka mësuar pranë Martin Berasategit dhe Feran Adrias - emra që janë sinonim i kuzhinës së së ardhmes. E ai sot më së shumti flet për kuzhinën e së kaluarës.

Projekti i tij i ri quhet La Carnera dhe jeton brenda vetë Kaleja-s. Është një menu familjare e mbyllur me ushqim shtëpie, me çmim rreth 40 euro, që do të shërbehet një ose disa herë në muaj. Qëllimi, thotë Karnero, është të tregojë se ushqimi i gatuar në shtëpi mund të hahet edhe në qendër të qytetit - jo vetëm te gjyshja në fshat.

Ta kuptosh kuzhinën, jo ta shpikësh

Karnero thotë se më shumë e intereson ta kuptojë kuzhinën andaluziane që ekziston tashmë, sesa të krijojë gjellë të reja. Përmend agvadiljot, gjellët me lëng të vendlindjes së tij, salmorehon me mish dhe receta të tjera të vjetra që i ruajnë familjet. Zjarri, gjellët e ziera dhe produkti stinor janë gjuha e tij.

Të njëjtën logjikë e zbatoi edhe në restorantin e vet. Menunë e shkurtër të degustimit në Kaleja e hoqi, ndërsa të gjatën e shkurtoi nga 19 në 12 gjellë. Më pak pjata, më shumë kuptim - një vendim i rrallë në një botë ku numri i servirjeve shpesh shitet si cilësi.

Më i mprehtë është kur flet për kolegët. E shqetësojnë restorantet që shërbejnë përbërës gjysmë të gatshëm të përgatitur industrialisht, dhe kuzhina ku historia e gjellës është bërë më e rëndësishme se vetë gatimi. Me fjalë të tjera: menuja është shkruar si roman, ndërsa në pjatë - diçka nga qeseja.

Për Malagën ka ndjenja të përziera. Gëzohet që qyteti rritet, por ka frikë nga humbja e autenticitetit dhe nga turistët e shumtë. Për ushqim të vërtetë tradicional rekomandon Mesón Mariano. Nëse një kuzhinier me yll Michelin duhet t'i mbrojë publikisht gjellët me lëng të vendlindjes së tij, kush do ta mbrojë tavçe gravçen në qendrat turistike?