Здружението на здравствени работници на Србија денеска официјално ја повика Дијана Хрка да го прекине штрајкот со глад, изразувајќи „целосна“ поддршка за студентите на Медицинскиот факултет во Белград кои веќе упатија ист апел. Хрка штрајкува веќе 14 дена пред српскиот Парламент, по трагедијата во која нејзиниот син беше меѓу 16-те загинати при уривање на бетонската настрешница на железничката станица во Нови Сад.

Во соопштението, здравствените работници наведуваат дека од професионални и хуманитарни причини ја молат Хрка да престане со штрајкот и „заедно да ја продолжат борбата“. Тие истакнуваат дека секој живот е важен, особено нејзиниот, „во оваа игра на исцрпеност“.

„Како здравствени работници, ја повикуваме Дијана Хрка да ги слушне студентите по медицина и нас, бунтовните здравствени работници“, стои во соопштението. Тие додаваат дека ја разбираат недовербата, но апелираат барем да ги слушне младите – „паметната иднина на оваа земја“.

Студентите од блокадата на Медицинскиот факултет синоќа јавно ја замолија Хрка да го прекине протестот со глад.