Вчера се навршија 27 години од трагичната смрт на принцезата Дијана – жената која светот ја нарече „принцеза на срцата“, а која загина во сообраќајна несреќа во Париз, заедно со Доди Ал-Фајед и возачот Хенри Пол. И по речиси три децении, Дијана останува симбол на човечност, емпатија и тивка болка зад кралската фасада.

По повод годишнината, повторно во фокусот се најдоа нејзините шокантно искрени признанија, објавени во книгата на Ендрју Мортон „Дијана – нејзината вистинска приказна“, базирана на тајни аудиоснимки од 1991 година. Од нив станува јасно дека бајката со принцот Чарлс завршила уште пред да започне бракот.

Дијана открива дека нејзината борба со булимијата започнала само една недела по веридбата, по коментар на Чарлс за нејзината тежина. Психолошкиот притисок, постојаното присуство на медиумите и емоционалната запоставеност од идниот сопруг, според неа, биле неподносливи.

Во своите признанија таа говори и за длабоката поврзаност на Чарлс со Камила Паркер Боулс – цвеќето што ѝ го испраќал, телефонските разговори што ги слушала и нараквицата со иницијали што ѝ ја подарил само две недели пред свадбата.

„Бев уништена. Сакав да се повлечам, но ми рекоа дека е предоцна – моето лице веќе беше на сите сувенири“, сведочи Дијана.

Непосредно пред венчавката, осаменоста во Бакингемската палата, студениот однос на кралското семејство и чувството дека е „жртвувана“ за да се исполни кралската должност, целосно ја скршиле.

Иако свадбата во 1981 година беше претставена како бајка за целиот свет, за Дијана таа била почеток на долга и тивка борба – борба што јавноста ја разбра дури години подоцна.