Тешка несреќа ја потресе Индија откако на предизборен митинг на популарниот актер и политичар Вијај во јужната држава Тамил Наду загинаа најмалку 39 лица, а повеќе од 90 беа повредени во масовен метеж. Настанот се случи во Караур, каде што се собраа околу 25 до 30 илјади луѓе за да го слушнат својот идол, кој се обрати од кровот на камион.

Сцените од локалните медиуми покажуваат како толпата се турка околу возилото, а Вијај им фрла шишиња со вода на оние што колабираа од жештината, во обид да помогне пред ситуацијата да излезе од контрола. Иако полицијата и медицинските екипи интервенираа, сведоци велат дека амбулантите со тешкотии се пробиваа низ масата, а дел од очевидците укажуваат и на ненадејно прекинување на струја што можеби предизвикало паника.

Меѓу загинатите има 17 жени, 13 мажи и девет деца. „Моето срце е скршено, сум во неиздржлива болка и тага“, напиша Вијај на социјалните мрежи, изразувајќи сочувство до семејствата на жртвите. Тој најави финансиска поддршка од 2 милиони рупии за семејствата на загинатите и 200.000 рупии за повредените – двојно повеќе од сумите што ги понуди државата.

Главниот министер на Тамил Наду, М. К. Сталин, оцени дека во историјата на државата никогаш досега не се случила ваква трагедија на политички собир. Тој нареди целосна истрага, предводена од висок судски претставник, за да се утврди одговорноста за несреќата.

Вијај, кој повеќе од три децении е меѓу најголемите ѕвезди на тамилската кинематографија, минатата година ја формираше својата партија Tamilaga Vettri Kazhagam. Од почетокот на кампањата привлекува огромни маси луѓе, а овој митинг требаше да биде еден од најголемите во пресрет на изборите наредната година. Наместо тоа, заврши со најголемата трагедија поврзана со политички собир во Тамил Наду.