Инспектор за храна при Агенција за храна и ветеринарство неделава забрани увоз на 22,3 тони киви наменети за индустриска преработка, поради утврдени сериозни неправилности во квалитетот и безбедноста на производот.

Како што информираат од АХВ, станува збор за 22.340 килограми киви увезени од Република Србија, кај кои при органолептички преглед било утврдено присуство на ларви и инсекти, како и променети органолептички својства. Поради тоа, пратката била оценета како небезбедна и за увоз и за понатамошна преработка.

На увозникот му е издадено решение со кое се наложува нештетно уништување на спорната количина овошје, откако тој ја известил Агенцијата дека пратката не може да биде вратена во земјата извозник.

Од АХВ потенцираат дека контролите на увозната храна се спроведуваат континуирано со цел заштита на здравјето на потрошувачите и спречување небезбедни производи да завршат на домашниот пазар.