По успешната аквизиција спроведена од АЛТА банка АД Белград, Стопанска банка АД Битола и официјално стана дел од АЛТА Груп, една од најдинамичните финансиски групации во регионот. Процесот е реализиран со согласност на Народната банка на Република Северна Македонија и во согласност со сите регулаторни и пазарни стандарди.

„Аквизицијата на Стопанска банка Битола е пресвртница во регионалниот банкарски сектор и темел за европската перспектива на нашата групација. Со ова обединување градиме нова димензија на банкарство – заснована на достапност, доверба и технолошка супериорност,“ изјави Давор Мацура, претседател на Управниот одбор на АЛТА банка и сопственик на групацијата.

Претседателката на Управниот одбор на Стопанска банка Битола, Александра Радевска, оцени дека вклучувањето во системот на АЛТА Груп претставува нова развојна фаза за банката и дополнителна вредност за клиентите и вработените.

„Нè поврзува не само деловната визија, туку и историската и културна блискост на нашите народи, што дава дополнителна сила на ова партнерство,“ изјави Радевска.

Со проширувањето на работењето во Северна Македонија, АЛТА банка најавува дека ќе создаде нови можности за економска соработка меѓу двете земји, со акцент на иновативни финансиски решенија и подобрено корисничко искуство.

Стопанска банка Битола, една од најстарите банки во државата со речиси 80-годишна традиција, задржува континуитет на работењето и својот фокус на поддршка на граѓаните и економијата.

АЛТА Груп, со седиште во Белград, е современа финансиска групација која обединува банкарски, инвестициски и платни услуги, препознатлива како лидер во дигиталните платежни решенија.