Долгот на САД надмина 38 трилиони долари, според податоците од Министерството за финансии на САД. Ова е најбрзото зголемување на долгот за дополнителен трилион долари од пандемијата на коронавирусот, бидејќи беше постигнато за помалку од три месеци. САД достигнаа 37 трилиони долари бруто национален долг на 12 август оваа година.

Најновиот извештај на Министерството за финансии, кој ги евидентира дневните податоци за финансиите на САД, исто така покажува дека долгот по глава на жител се зголемил на 110.637 долари.

Мајкл А. Петерсон, извршен директор на Фондацијата „Питер Г. Петерсон“, непартиска, непрофитна организација фокусирана на фискална политика, рече дека долгот од 38 трилиони долари, достигнат за време на затворањето на владата, е најновиот вознемирувачки знак дека пратениците не успеваат да ги исполнат своите основни фискални обврски.

„Ако се чини дека позајмуваме побрзо од кога било, тоа е затоа што е така. Надминавме 37 трилиони долари пред само два месеци, а темпото со кое се движиме е двојно поголемо од стапката на раст од 2000 година“, предупреди Петерсон.

„Мудис“ го намали кредитниот рејтинг на САД од Ааа на Аа1 во мај, одразувајќи ја загриженоста на инвеститорите за растечкиот долг на владата. Две други големи агенции за кредитен рејтинг, „Стандард енд Пурс“ и „Фич рејтингс“, исто така го намалија рејтингот на САД.