Американскиот воздушен сообраќај се соочува со сериозна криза поради блокадата на федералната влада и недостигот од финансирање. Илјадници контролори на летови и службеници за безбедност работат без плата, што веќе предизвикува масовни доцнења и откажувања на летови низ земјата.

Министерот за сообраќај Џон Дафи предупреди дека целосен прекин на американскиот воздушен систем е можен доколку ситуацијата стане небезбедна. „Ќе го затвориме целиот воздушен простор ако процениме дека ситуацијата е ризична. Нема да дозволиме луѓето да патуваат додека не бидеме сигурни во безбедноста“, изјави Дафи, додавајќи дека моментално има „значителни доцнења“ и „зголемен ризик“ поради блокадата.

Блокадата трае повеќе од еден месец и ги остави без редовни примања околу 13.000 контролори на воздушен сообраќај и над 50.000 службеници на Агенцијата за безбедност на транспортот (TSA). Некои од нив не доаѓаат на работа поради замор, боледувања или финансиски притисок, што доведува до сериозен недостиг на кадар во најпрометните аеродроми, како Њујорк, Атланта и Лос Анџелес.

Извршниот директор на „United Airlines“, Скот Кирби, предупреди дека блокадата веќе влијае врз резервациите и патничкиот сообраќај, особено со приближувањето на празничната сезона. Според американските медиуми, доцнењата на летови се дури десет пати почести отколку во нормални услови, а дел од контролните центри работат со само половина од потребниот број контролори.

Иако Меѓународната асоцијација за воздушен транспорт (IATA) уверува дека засега нема сериозни безбедносни инциденти, експертите предупредуваат дека системот работи на раб на издржливост, а продолжување на блокадата може да доведе до целосен застој на авионскиот сообраќај.

Дафи истакна дека нема намера да отпушта контролори кои се на боледување. „Тие се обидуваат да ги издржуваат своите семејства. Ќе ги замолам сите да се вратат на работа“, додаде тој.

Сојузните власти најавуваат дека приоритет ќе биде враќањето на стабилноста во воздушниот систем, но без политички договор за финансирање – ризикот за целосен застој на летовите останува реален.