Министерството за правда на Соединетите Американски Држави објави илјадници нови документи поврзани со истрагите за осудениот сексуален престапник Џефри Епстин. Според CBS News, значителен дел од материјалите – најмалку 550 страници – се целосно затемнети, додека останатите се делумно редактирани.

Во документите се појавуваат и фотографии, како и спомнувања на повеќе јавни личности, меѓу кои Бил Клинтон, Мајкл Џексон, Мик Џегер и Бил Гејтс. Објавените материјали опфаќаат снимки од резиденциите на Епстин, истражни белешки, како и транскрипти од големата порота, вклучително и делови поврзани со обвиненијата против неговата долгогодишна соработничка Гислен Максвел.

Министерството за правда тврди дека редакциите се направени во согласност со Законот за транспарентност на досиејата на Епстин, со цел да се заштитат личните податоци на жртвите, да се отстранат насилни и сексуално експлицитни содржини и да не се загрозат активните истраги.

Сепак, објавувањето на документите предизвика остри реакции од двете страни на политичкиот спектар. Дел од демократите и републиканците сметаат дека голем број страници се „прекумерно редактирани“, што, според нив, го нарушува и духот и целта на законот за транспарентност.

Министерството ги отфрли ваквите обвинувања, наведувајќи дека документите биле прегледувани од повеќе од 200 адвокати, токму за да се обезбеди заштита на жртвите и законитост на процесот.

Објавувањето доаѓа по неколкумесечни политички судири и незадоволство кај дел од најлојалните поддржувачи на претседателот Доналд Трамп, кои јавно ја критикуваа неговата администрација поради одбивањето целосно да ги обелодени сите досиеја поврзани со случајот Епстин.

И покрај објавата, останува отворено прашањето: колку навистина ќе се дознае за мрежата на моќ и влијание што со години го штитела Епстин?