Во раните утрински часови денес, околу 01:00 часот, во населбата Бит Пазар во Скопје, полицијата пронашла рачна бомба М75 во возило марка „Фиат“ со скопски регистарски таблички, сопственост на лице кое моментално се наоѓа во Италија.

Според информациите од МВР, сопственикот Е.Р. добил заканувачка порака во која бил известен дека во неговото возило е поставена бомба.

„Денес (06.11.2025) во 02:41 часот во СВР Скопје е пријавено дека околу 01:00 часот едно лице влегло во гаражата на семејната куќа на Е.Р., во населбата Бит Пазар, кој моментално се наоѓа во Италија. Малку подоцна, сопственикот добил заканувачка порака и известување дека во неговото возило е поставена бомба,“ соопштија од полицијата.

На местото веднаш пристигнала екипа од МВР, која по преземени мерки и безбедносна процена, во возилото пронашла рачна бомба поврзана со рачката од возачката врата.

Покрај тоа, при претрес на друго возило, исто така „Фиат“ но со италијански регистарски ознаки, сопственост на неговиот брат А.Е., пронајдена е кутија со 100 патрони за автоматско оружје калибар 7,62 мм.

Во тек е истрага за утврдување на мотивите и евентуалните осомничени за поставување на експлозивната направа. Од МВР најавуваат дека јавноста ќе биде навремено информирана за сите нови детали од случајот.