Центарот за јавно здравје – Штип регистрира два нови случаи на лица со симптоми на труење од сендвичи со пилешко и компири, приготвени во локална сендвичара. Со тоа, вкупниот број на заболени ученици и вработени од средното стручно училиште се искачи на 17.

„Кај дел од пациентите од земените примероци на измет е изолирана Salmonella enteritidis. Досега се земени 35 примероци од храна, вработени и работни површини, кои се испратени на анализа во Институтот за јавно здравје во Скопје,“ информира епидемиологот Светлана Живкова од ЦЈЗ – Штип.

Резултатите од испитувањата сè уште се очекуваат. Од Инфективното одделение при Клиничка болница – Штип известуваат дека во моментот се хоспитализирани пет пациенти, додека десетмина се третираат во дневната болница. Сите се во стабилна состојба.

Сендвичарата е затворена, извршен е санитарен преглед на сите вработени, како и нивна едукација за хигиенските мерки.