Бугарија останува во групата земји со економии премногу зависни од државата и со слаба заштита на имотот, покажува новата студија на канадскиот институт „Фрејзер“ – „Економска слобода во светот, 2025“, објавена од Институтот за пазарна економија (ИМЕ). Во рангирањето се опфатени 165 земји.

На врвот се наоѓаат Хонг Конг и Сингапур, додека на дното се Венецуела и Зимбабве. Бугарија е на 56-то место – веднаш по Грција и пред Тајланд. Пред пандемијата, земјата накратко се искачи околу 40-тото место, но од 2020 година бележи пад и повторно е надвор од групата на најслободни економии.

Вкупната оценка се формира врз основа на 45 индикатори во пет категории – даноци, лиценци и дозволи, субвенции, правосудство и ефикасност на институциите. Бугарија добива највисоки оценки за нискиот рамен данок и стабилноста на валутата, како и за слободата на меѓународна трговија благодарение на членството во ЕУ.

Сепак, најслаб резултат земјата бележи во категоријата „правен систем и имотни права“, односно функционирањето на судството, обвинителството и полицијата. Според ИМЕ, ова е полето во кое Бугарија е најлошо рангирана меѓу сите земји во Европската унија, а споредбено е на ниво со Албанија и Казахстан.

„Соседи“ на Бугарија во оваа категорија се Гамбија, Саудиска Арабија и Тајланд. Студијата ги анализира податоците за 2023 година и го одразува закрепнувањето на економиите по ограничувањата од пандемијата.